2 ოქტომბრის ადგილობრივ თვითმმართველობის არჩევნებზე ამომრჩეველთა საერთო რაოდენობა 3 497 345 იქნება. ამის შესახებ ცესკოს პრესსპიკერმა, ნათია იოსელიანმა ბრიფინგზე განაცხადა.

"თბილისში ამომრჩეველთა რაოდენობა შეადგენს 1 002 900-ს, აქედან 41 314 ამომრჩეველი, რომელიც რეგისტრირებულია კრწანისის საარჩევნო ოლქში, არჩევნებში მონაწილეობას ელექტრონული ტექნოლოგიების გამოყენებით მიიღებს", — ამბობს იოსელიანი.

მისივე ინფორმაციით, ასაკის გამო წელს არჩევნებში პირველად მიიღებს მონაწილეობას 39 135 ადამიანი. იოსელიანი აღნიშნავს, რომ ამომრჩეველთა განახლებული სიების საჯარო ინფორმაციისთვის მიკუთვნებული ვერსია ხელმისაწვდომია საარჩევნო რეგისტრაციის მქონე პარტიებისთვის, საინიციატივო ჯგუფებისთვის, საარჩევნო კანონმდებლობით განსაზღვრული დამკვირვებელი ორგანიზაციებისა და ამომრჩევლებისთვის.

გარდა ამისა, ნათია იოსელიანის განცხადებით, დღეიდან დაიწყო ბიულეტენების ბეჭდვის პროცესი და მიმდინარეობს 9 სტამბაში.

საქართველოში ადგილობრივი თვითმმართველობის არჩევნები 2 ოქტომბერს გაიმართება.