ქართული ოცნების ერთ-ერთი ლიდერის, მამუკა მდინარაძის განცხადებით, მთავარი არხის დირექტორი ნიკა გვარამია იტყუება, როდესაც ამბობს, რომ მთავარი არხის ოპერატორი გადმოვარდნის შემდეგ, უგონო მდგომარეობაში იმყოფებოდა. მან ბრიფინგზე წარმოადგინა კადრები, სადაც ოპერატორის გადაადგილება ჩანს.

"ჩვენი ოფისის წინ ქარელში არის კამერა, რომელმაც გადაიღო გარკვეული ეპიზოდი. გვარამიამ რამდენჯერმე გაიმეორა, რომ ოპერატორი გადმოვარდნის შემდეგ იყო უგონო მდგომარეობაში და სასწრაფოში როდესაც რეკავდა ბექა ყორშია, მაშინაც იყო უგონო მდგომარეობაში. კადრში ხედავთ ოპერატორს, რომელიც გადაადგილდება კამერასთან ერთად, შემდეგ ჯდება და არანაირ უგონო მდგომარეობასთან არ გვაქვს საქმე. ეს არის კიდევ ერთი ტყუილის მხილება, იმისთვის, რომ მოხდეს მანიპულაცია და მოატყუოს გვარამიამ საზოგადოებას, თითქოს ოპერატორი იყო უგონო მდგომარეობაში", — თქვა მამუკა მდინარაძემ.

მდინარაძემ ასევე ისაუბრა, რომ ნაციონალური მოძრაობა ტყუილში ამხილა.

"ვაგრძელებთ ნაცმოძრაობის და მისი ერთ-ერთი გამოკვეთილი ლიდერის ნიკა გვარამიას ამორალური ტყუილის მხილებას. თქვენ ალბათ გახსოვთ, რომ ორი დღის წინ ჩვენმა თანაგუნდელმა შალვა პაპუაშვილმა ბრიფინგი ჩაატარა, სადაც ის საუბრობდა ნაციონალური მოძრაობის ე.წ მედიასაშუალებების მიერ დაზინფორმაციის გავრცელებაზე, ზიზღის ენასა და მანიპულაციაზე. შეგვიძლია ვთქვათ, რომ ნიკა გვარამიასა და მისი ტელევიზიის მიერ მოწყობილი შოუ გუშინდელი მთლიანად შეიცავდა, როგორც დეზინფორმაციას, ასევე, ზიზღის ენასა და მანიპულაციას, როგორც იყო სრული ბუკეტი იმისა, რაზეც ჩვენ ორი დღის წინ ვისაუბრეთ და რისი ლუსტრირებაც მოვახდინეთ", — თქვა მამუკა მდინარაძემ.

მთავარი არხმა გუშინ, 15 სექტემბერს განაცხადა, რომ ქარელში, ქართული ოცნების წევრებმა მათი ოპერატორი პარტიის შტაბის მეორე სართულიდან გადმოაგდეს. როგორც ჟურნალისტი ბექა ყორშია ყვება, მმართველი პარტიის შტაბის წევრები მისვლისთანავე აგრესიულად შეხვდნენ. მისი თქმით, იყო ფიზიკური დაპირისპირებაც.

ინციდენტის შემდეგ, ქართული ოცნების ოფისში სპეციალური ბრიფინგი გაიმართა, სადაც პარტიის აღმასრულებელმა მდივანმა, მამუკა მდინარაძემ განაცხადა, რომ მთავარი არხის ოპერატორი პარტიის ქარელის შტაბის მეორე სართულიდან შემთხვევით გადმოვარდა. ის ადასტურებს, რომ შტაბის წევრებსა და ტელევიზიის გადამღებ ჯგუფს შორის სიტყვიერი დაპირისპირება იყო, თუმცა გამორიცხავს ფიზიკურ შეხებას.

"აივანზე ვიყავით, ესენი შიგნით იყვნენ, შუქიც ჩააქრეს და შემდგომ უკვე, როდესაც მე და ბექა სტენდაფს ვწერდით, გამოვარდა 4 თუ 5 ადამიანი. ზოგი უკნიდან კამერის წართმევას ცდილობდა, ზოგი წინიდან და ვარიდებდი თავს. უკან-უკან მივდიოდი, იმიტომ, რომ მინდოდა დისტანცია მქონოდა იმ აგრესორ ადამიანსა და ჩემს შორის, რა დროსაც მოაჯირი ყოფილა უკან და ამ ჭიდაობაში, ხელის კვრაში მე წონასწორობა დავკარგე და გადავვარდი. უბრალოდ თავს ვიცავდი, მაგრამ ვერ დავიცავი ბოლომდე თავი და მოხდა ის, რაც მოხდა, გადმომაგდეს, ამ სიტყვის სრული მნიშვნელობით," — ამბობს ლევან აბლოთია," — ამბობს ლევან აბლოთია.

საქმეზე გამოძება სისხლის სამართლის კოდექსის 124-ე მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.

გაიგე მეტი: