სახალხო დამცველის, ნინო ლომჯარიას თქმით, გავრცელებული ფაილების მიხედვით, სუს-მა დაზუსტებით იცოდა, რომ ნინოწმინდის პანსიონში მეუფე სპირიდონი ომბუდსმენს წლების განმავლობაში არ უშვებდა. ის ამბობს, რომ ამ ჩანაწერებში თავადაც მოხვდა, თუმცა მისი ვარაუდით, ამის მიზეზი არის ის, რომ სუს იმ სასულიერო პირს უსმენდა, ვისაც ლომჯარია ესაუბრა. ომბუდსმენი დასძენს, რომ არც ისაა გამორიცხული, თავად მასაც თუ უსმენდნენ.

"სულ მცირე, რაც ვნახე, მათ იცოდნენ, რომ სახალხო დამცველის წარმომადგენლებს არ უშვებდნენ ნინოწმინდის პანსიონში წლების განმავლობაში მეუფე სპირიდონის მითითებით. ეს მათთვის ზუსტად იყო ცნობილი. [...] იქ არის ერთი საუბარი, როდესაც საპატრიარქოს წარმომადგენელი მირეკავს და ამ შემთხვევაში ასე ვთქვათ ჩვენი საუბარი დაექვემდებარა მიყურადებას, თუმცა, კიდევ ერთხელ ვამბობ, რომ მე მოვხვდი იქ დიდი ალბათობით იმიტომ, რომ უსმენდნენ იმ პირს, ვინც დამირეკა", — აცხადებს ლომჯარია.

მმართველი პარტიის მხრიდან ჩანაწერების ფაბრიკაციასთან დაკავშირებით ოპოზიციის მიმართ წაყენებულ ბრალდებებზე სახალხო დამცველი აცხადებს, რომ მისი აზრით, ამ მასშტაბის მასალის ფაბრიკაცია შეუძლებელია.

"მე არ ვიცი, რას აბრალებს მმართველი ძალა ოპოზიციას ან რა როლი შეიძლება ამ ყველაფერში ოპოზიციას ჰქონოდა, ფაქტია, რომ ჩემი შთაბეჭდილებით, ამ მასალის ფაბრიკაცია წარმოუდგენელია, იმიტომ, რომ არის მართლაც ათასობით, ანუ ზღვა ფაილებზე და მასალაზეა საუბარი. მათ შორის არის ისეთი საუბრები, რაც დაადასტურეს პირებმა", — აცხადებს სახალხო დამცველი.

ლომჯარია აღნიშნავს იმასაც, რომ ჩანაწერებს შორის მოხვედრილია მისი მდივნისა და ერთ-ერთი დიპლომატიური კორპუსის წარმომადგენლის საუბარიც, მიუხედავად იმისა, რომ სრულიად ყოფით თემაზე მსჯელობდნენ. მისი თქმით, საქართველოს საკანონმდებლო ბაზა აძლევს უსაფრთხოების სამსახურს შესაძლებლობას რომ ყოველგვარი კონტროლის გარეშე მოუსმინოს თითოეულ მოქალაქეს და აქამდე არც ერთ მსგავს საქმეზე ეფექტური გამოძიება არ ჩატარებულა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: