კულტურის მინისტრის, თეა წულუკიანის თქმით, ღალატი ქართული ოცნების შიგნით მოხდა. ის ასევე აღნიშნავს, რომ გავრცელებული ჩანაწერები პოლიტიკური ავანტიურაა.

"ქართული ოცნების პოლიტიკური ოჯახის შიგნით არის მომხდარი ღალატი. ეს არის ფაქტი, პოლიტიკური ავანტიურა, რომელიც არის წამოწყებული. [...]

მე მინდა დავიცვა ის ადამიანები, ვისაც სჯერა ამ ადამიანების, იყავით ფრთხილად, იმიტომ რომ ჩვენ საქმე გვაქვს გაუაზრებელ პროცესთან. მე არ გამოვრიცხავ, რომ ყოფილი საჯარო მოხელეები, სხვადასხვა პროფესიონალიზმითა თუ სისუფთავით ცნობილი ხალხი, რომლებსაც სჯერათ ამ პროცესის აღმოჩნდეს პოლიტიკური ავანტიურის მსხვერპლი. ეს გამოჩნდება არჩევნების შემდეგ, ამიტომ მნიშვნელოვანია, ყველას გვესმოდეს, თავი უნდა დავიცვათ ჩვენი ქვეყანა იმისგან რასაც ოპოზიცია ამზადებს ოპოზიციის შემდეგ", — თქვა წულუკიანმა.

ჩანაწერების გავრცელებასთან დაკავშირებით გახარიასა და მისი გუნდის მისამართით კითხვებს ქართული ოცნებადან კახა კალაძე და ირაკლი ღარიბაშვილიც სვამს.

გამოთქმულ კრიტიკასა და ბრალდებას პალიტრანიუსში გახარიას გუნდის ერთ-ერთი წევრი კახაბერ ქემოკლიძე გამოეხმაურა. ქემოკლიძის თქმით, "პირი გამოირეცხონ, როდესაც მათ გვარებს ახსენებენ". მისი შეფასებით, ეს გადაბრალების მცდელობაა.

გაიგე მეტი:

• თუ დადასტურდა, პოლიტიკური პასუხისმგებლობა უნდა აიღონ — ქემოკლიძე გავრცელებულ ჩანაწერებზე
• ჩვენ უკანონოდ არავინ ჩაგვიწერია, არც მე და არც გახარიას — მეზვრიშვილი
• ორგანიზებული შეტევები ქართულ ეკლესიაზე კატეგორიულად მიუღებელია — გახარია გავრცელებულ ფაილებზე

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

• მედიის ოთხმა წარმომადგენელმა გავრცელებულ ჩანაწერებში საკუთარი საუბარი ამოიცნო
• რაც ვნახე მესენჯერიდან არის ძალიან ბევრი რამე — კვესიტაძე გავრცელებულ ჩანაწერებზე
• ხაზარაძე გავრცელებული ჩანაწერების ნამდვილობას ადასტურებს
• ტაბულას რედაქტორმა გავრცელებულ ფაილებში საკუთარი საუბარი ამოიცნო

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი:

• პედოფილია, პირადი ცხოვრების დეტალები და კავშირები რუსეთთან — რა წერია გავრცელებულ ფაილებში, ნაწილი I