პრემიერმინისტრის, ირაკლი ღარიბაშვილის განცხადებით, სამწუხაროა ის ფაქტი, რომ მედიები გავრცელებულ ფაილებს ტირაჟირებას უკეთებენ და დისკრედიტაციას ახდენენ. მისივე თქმით, ეს ფაქტი სახელმწიფოსა და ეკლესიის წინააღმდეგ შეთქმულებაა.

"პირველ რიგში, მე მინდა, კიდევ ერთხელ გავიმეორო, მოსახლეობას მინდა ვუთხრა, ეს არის პირდაპირი პირობა ეკლესიის წინააღმდეგ, მღვდელმთავრების წინააღმდეგ. მათი დისკრედიტაციისთვის, ეს არის შეთქმულება სახელმწიფოს წინააღმდეგ. რაც არის ყოვლად დაუშვებელი და რა თქმა უნდა, სახელმწიფო კანონის სახელით გასცემს პასუხს, ყველას და ყველაფერს დაარქმევს სახელს. რა თქმა უნდა, ძალიან სამწუხარო არის ის ფაქტი რომ ტელევიზიები, თქვენი ტელევიზიები ამ ყველაფერს უკეთებენ ტირაჟირებას, ამ ტყუილ-მართალს და ეკლესიისა და მღვდელმთავრების დისკრედიტაციას ახდენთ", — თქვა ირაკლი ღარიბაშვილმა.

პრემიერმინისტრის შეფასებით, იმის თქმა, რომ ოპოზიცია ამ ჩანაწერებს აკეთებდა ძალიან პრიმიტიულია.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: