ჯანდაცვის მინისტრის ეკატერინე ტიკარაძის განცხადებით, 60 წელს ზემოთ მოქალაქეების 67% კორონავირუსით დაინფიცირების შემთხვევაში, ჰოსპიტლებში ხვდება. მისი თქმით, მაღალია ლეტალობის მაჩვენებელიც და ის 15%-ს აღემატება.

"სავალდებულო ვაქცინაციისგან ჩვენ, ჯერჯერობით, მაინც თავს ვიკავებთ. ჩვენ შემდეგ დღეებში გამოვაქვეყნებთ სტატისტიკას ამ ჭრილში და ჰოსპიტალში 60 წელს გადაცილებული მოქალაქეების 67% ხვდება, საიდანაც ძალიან მაღალია ლეტალობის მაჩვენებელი და 15%-ს აღემატება. ჩვენ ასევე, ფინანსთა სამინისტროს წარვუდგინეთ ანალიზი იმაზე, რომ ამ მოქალაქეების წახალისებით და მეტად უფრო ინტენსიური ვაქცინაციით ჩვენ შეგვიძლია ჰოსპიტალურ სექტორში არსებული დაწოლის რისკების მოხსნა, დაახლოებით, 50%-ით", — განაცხადა მან.

ტიკარაძის განცხადებით, მათი სურვილა, რომ გარდა სავალდებულო ვაქცინაციისა, მაქსიმალურად მალე მოხდეს ყველა იმ ბერკეტის გამოყენება, რომელიც ამ ჯგუფში ვაქცინაციის მხრივ უფრო მეტ აქტიურობას გამოიწვევს. ჯანდაცვის მინისტრმა ისაუბრა იმაზეც, რომ 60 წელს ზემოთ ასაკის მოქალაქეების ვაქცინაციის პროცესში მეტად გასააქტიურებლად სხვადასხვა აქტივობა გატარდება. მისი თქმით, მათ შორის, იმსჯელებენ ფინანსურ წამახალისებელ ღონისძიებებზეც და უბნებზე ოჯახის ექიმების გააქტიურებაზე.