ნაციონალურო მოძრაობის ერთ-ერთი ლიდერის, ხატია დეკანოიძის განცხადებით, ქართულ ოცნებას არ აინტერესებს საქართველოს ევროატლანტიკური კურსი. მისი თქმით, პროკურორის არჩევის წესის ჩაგდებით საქართველო სცილდება დასავლეთს და ევროკავშირისა და აშშ-ის განცხადებებიც არსებულ მძიმე რეალობას ასახავს.

"ეს განცხადებები კიდევ ერთხელ ასახავს იმ ძალიან მძიმე რეალობას, რომელიც ჩვენ გვაქვს ქვეყნის საგარეო პოლიტიკურ ორიენტაციასთან დაკავშირებით. ქართულ ოცნებას არ აინტერესებს და არ აწუხებს საქართველოს ევროატლანტიკური კურსი. ამ საკონსტიტუციო ცვლილებების ჩაგდებით, კერძოთ პროკურორის არჩევის წესის ჩაგდებით, კიდევ ერთხელ ხაზი გაუსვეს იმას, რომ პრაქტიკულად კანონის უზენაესობის სფეროში უმძიმესი გარღვევით და ჩავარდნით საქართველო სცილდება ყოველდღიურად ევროატლანტიკურ მისწრაფებებს", — თქვა ხატია დეკანოიძემ.

გუშინ, 7 აგვისტოს პარლამენტმა საკონსტიტუციო ცვლილებებს მხარი დაუჭირა, თუმცა პროკურორის არჩევის წესის გამოკლებით. პროკურორის არჩევის წესის ცვლილება შარლ მიშელის დოკუმენტის ერთ-ერთი ძირითადი პირობა იყო. მმართველი პარტია მხარს უჭერს გენერალური პროკურორის არჩევას მხოლოდ 76 დეპუტატის თანხმობის საფუძველზე. ოპოზიციაში კი აცხადებენ, რომ რაც უფრო მეტი დეპუტატის თანხმობა იქნება საჭირო გენერალური პროკურორის ასარჩევად, მით უფრო მეტი ლეგიტიმაცია ექნება არჩეულ კანდიდატს. მათივე თქმით, ამ ინსტიტუტის დამოუკიდებლობის აღიარებისთვის მხოლოდ ეს ცვლილება არ არის საკმარისი, თუმცა, აცხადებენ, რომ ამ ეტაპზე მნიშვნელოვანია შესრულდეს მიშელის დოკუმენტით განსაზღვრული დებულებები.

პარლამენტის გადაწყვეტილების შემდეგ, განცხდებები გაავრცელეს ამერიკის შეერთებული შტატების საელჩომ და ევროკავშირის ელჩმა საქართველოში. აშშ-ს აზრით, ქართული ოცნების უარი, მხარი დაეჭირათ მთავარი პროკურორის არჩევასთან დაკავშირებული ცვლილებებისთვის, მართლმსაჯულების სისტემის რეფორმების განსახორციელებლად მმართველი პარტიის კიდევ ერთი გატეხილ პირობაა. ევროკავშირის ელჩმა, კარლ ჰარცელმა კი წუხილი გამოთქვა იმის გამო, რომ ქართულმა ოცნებამ მხარი არ დაუჭირა სასამართლო სისტემის რეფორმასთან დაკავშირებულ კიდევ ერთ ვალდებულებას.