ინდონეზიის ციხეში ხანძარს 41 ადამიანის სიცოცხლე ემსხვერპლა, 73-მა მსუბუქი დაზიანებები მიიღო. ინფორმაციას ამის შესახებ Reuters ავრცელებს. გამოცემა ტანგერანგის საავადმყოფოზე დაყრდნობით წერს, რომ ზოგიერთი ცხედარი იმდენად დამწვარი იყო, მათი ამოცნობა შეუძლებელი იყო.

პოლიციის განცხადებით, ხანძარი, შესაძლოა, ელექტროგაუმართაობით იყოს გამოწვეული. სამართლისა და ადამიანის უფლებათა მინისტრმა, იასონა ლაოლიმ ბრიფინგზე თქვა, რომ ელექტროგაყვანილობა დაწესებულების აშენების შემდეგ, 1972 წლიდან არ განახლებულა.

მთავრობის მონაცემებით, ტანგერანგის ციხეში ჯამში 2 000 პატიმარი იყო განთავსებული, რაც 3-ჯერ აღემატება მის ტევადობას. ლეოპოლდ სუდარიონომ, კრიმინოლოგმა და ავსტრალიის ეროვნული უნივერსიტეტის დოქტორანტმა, განაცხადა, რომ ციხის გადატვირთულობამ პატიმრების ევაკუაცია გაართულა.

იასონა ლაოლიმ დაადასტურა, რომ ცეცხლის გაჩენის მომენტში ციხე გადატვირთულ რეჟიმში მუშაობდა. მისივე თქმით, საკნები ამ დროს დაკეტილი იყო, ცეცხლი უკონტროლოდ ვრცელდებოდა და "ზოგიერთი ოთახის გახსნა ვერ მოხერხდა".

"ჩვენ ვთანამშრომლობთ შესაბამის ორგანოებთან, რათა დავადგინოთ ხანძრის გამომწვევი მიზეზები და რა თქმა უნდა, ჩამოვაყალიბოთ პრევენციის სტრატეგიები, რათა მსგავსი კატასტროფები აღარ განმეორდეს", - ნათქვამია მინისტრის განცხადებაში.