ეროვნული ბიბლიოთეკა აბრეშუმის გზის საერთაშორისო საბიბლიოთეკო ალიანსის წევრი გახდა. დღეისთვის აბრეშუმის გზის საბიბლიოთეკო ალიანსის წევრი რეგიონის 30-მდე ბიბლიოთეკაა, მათ შორის, ევროპის ქვეყნების ბიბლიოთეკებიც: ბრიტანეთის, გერმანიის, თურქეთის, საუდის არაბეთის, ყაზახეთის, ინდონეზიის, ყატარის, ტაილანდის, ჩეხეთის, პოლონეთისა და სხვა.

აბრეშუმის გზის საერთაშორისო საბიბლიოთეკო ალიანსი 2018 წელს, ჩინეთში, სიჩუანის რეგიონში, ქალაქ ჩენგდუში, საბიბლიოთეკო კონფერენციაზე შეიქმნა. ალიანსის იდეა სუნ იგანგს, ჩინეთის ეროვნული ბიბლიოთეკის დირექტორს ეკუთვნის.

ეროვნულ ბიბლიოთეკაში ამბობენ, რომ თანამშრომლობა პირველად 2019 წელს დაიგეგმა, თუმცა მხოლოდ წელს განხორციელდა. მათივე განცხადებით, ეს თანამშრომლობა მნიშვნელოვანია საერთაშორისო გამოცდილების გაზიარებისა და საბიბლიოთეკო საქმიანობის ხელშეწყობისთვის.

საქართველოს პარლამენტის ეროვნული ბიბლიოთეკა საერთაშორისო საბიბლიოთეკო ფედერაციისა და ევროპის ეროვნული ბიბლიოთეკების გაერთიანების წევრიც არის, სადაც მათ საქმიანობას მაია სიმონიშვილი წარადგენს.

ბიბლიოთეკაში აცხადებენ, რომ საერთაშორისო ჩართულობა, განსაკუთრებით, პანდემიურ რეალობაში, საბიბლიოთეკო სფეროსთვისა და მომავალი განვითარებისთვის განსაკუთრებით მნიშვნელოვანია.

ბიბლიოთეკებს ისტორიული მემკვიდრეობის დაცვისთვის არსებითი მნიშვნელობა აქვს, ამავე დროს, მსოფლიო კულტურის მონაცემთა გაცვლის ცენტრებია. ალიანსის ბიბლიოთეკების პასუხისმგებლობა, თანამშრომლობისა და განვითარების ხელშეწყობით, მთელ მსოფლიოში კულტურული მემკვიდრეობის დაცვა, მხარდაჭერა, კვლევების შედეგების დაცვა და კომუნიკაციების განვითარება გახლავთ.

"2 სექტემბერს ალიანსის პირველი საერთაშორისო კონფერენცია ვირტუალურად ჩატარდა, რომელშიც ეროვნული ბიბლიოთეკის წარმომადგენლობაც ჩაერთო. ჩენგდუს რეგიონში, საიდანაც ანტიკური პერიოდის აბრეშუმის გზა იწყებოდა, მრავალი სხვადასხვა ქვეყნის ბიბლიოთეკების თანამშრომლობაზე ისაუბრეს. ალიანსის შექმნის პირობა "მშვიდობიანი პარტნიორობა, ღიაობა და მიმღებლობა, ორმხრივი განვითარება და გამოცდილების გაზიარება გახლავთ", — აღნიშნავს კონფერენციაზე ეროვნული ბიბლიოთეკის წარმომადგენელი მაია სიმონიშვილი.

აბრეშუმის გზის რეგიონებში არსებული ქვეყნების ბიბლიოთეკები კოლექციების შექმნის, დაცვისა და სარგებლობის შესახებ ერთმანეთს უახლეს ინფორმაციას გააცნობენ. გათვალისწინებულია საერთაშორისო დონის ტრენინგებიც, რაც მონაწილე მხარეების პროფესიულ საქმიანობას ხელს შეუწყობს. ინტერესის სფეროა, აგრეთვე, კულტურული სიახლეების გაცვლა, სამეცნიერო და პრაქტიკული გამოცდილების გაზიარება, ცვლილებებისა და სტრატეგიების განხილვა.

"ჩვენ ვეცდებით, რომ ალიანსის ყველა წევრმა იგრძნოს ჰარმონიული თანამშრომლობის შედეგები, რათა უკეთესი საერთო მომავალი შევქმნათ. განსაკუთრებული ყურადღების საგანია ბიბლიოთეკების საშუალებით ქვეყნების მდგრადი განვითარების მიზნების ხელშეწყობა", — აღნიშნავს ჩინეთის ეროვნული ბიბლიოთეკის დირექტორი.

ალიანსმა აგრეთვე მოამზადა მანიფესტი, რომელიც ფორუმისა და გამოცდილების გაზიარების საფუძველზე, კულტურის სფეროში, ბიბლიოთეკებისა და წიგნის პროფესიონალთა თანამშრომლობის სხვადასხვა გზებს მოიაზრებს.