დაავადებათა კონტროლის ეროვნული ცენტრის ხელმძღვანელი ამირან გამყრელიძე ამბობს, რომ მისი კომენტარი, რომელიც პოლიტიკოსების მიერ ეპიდვითარების პოლიტიკას ეხებოდა არასწორად იყო ინტერპრეტირებული. გამყრელიძის განცხადებით, მან პალიტრანიუსთან თქვა, რომ კორონავირუსი პოლიტიკური დისკუსიების თემა გახდა და პოლიტიკოსები მეტ ყურადღებას ავლენენ კოვიდის თემის, როგორც პოლიტიკური თემის მიმართ.

მისივე განმარტებით, როდესაც თქვა, რომ საკოორდინაციო საბჭოზე მედიკოსები უმცირესობაში არიან, მხოლოდ რიცხობრივი უმცირესობა იგულისხმა და აღნიშნა, რომ საბჭოზე გადაწყვეტილებები კონსენსუსის პრინციპით მიიღება.

"ბოლომდე უნდა მოისმინოთ. მე იქ ვთქვი, რომ დღეს, სამწუხაროდ, კოვიდი პოლიტიკური დისკუსიების თემა გახდა. მეტ ყურადღებას ავლენენ პოლიტიკოსები ამ თემის მიმართ, როგორც პოლიტიკურის, ვიდრე ეპიდემიოლოგიური თემის მიმართ. ეს იყო ჩემი ნათქვამის არსი. მე ხშირად ვაფიქსირებ და ვამბობ, რომ პოლიტიკურ განცხადებებს არ ვაკეთებ. განა იმიტომ რომ არ შემიძლია. მე ვარ დღეს და დიდი ხანია უკვე აპოლიტიკური. ჩემთვის დღეს მთავარია, მოსახლეობის ჯანმრთელობაზე ვიზრუნო. არ ვერევი პოლიტიკაში და დამანებეთ რა თავი", — განაცხადა გამყრელიძემ.

ამირან გამყრელიძემ არჩევნების გადადებასთან დაკავშირებული კითხვის საპასუხოდ პალიტრანიუსის გადაცემა პოლიტ-ქალაქში თქვა, რომ საკოორდინაციო საბჭოზე ექიმები უმცირესობაში არიან, ამიტომ, გადაწყვეტილებას ამ საკითხზე პოლიტიკოსები მიიღებენ. გამყრელიძემ აღნიშნა ისიც, რომ არჩევნები, ზოგადად, ეპიდვითარებას ამძიმებს.

ჯანდაცვის მინისტრმა, ეკატერინე ტიკარაძემ ჩამოთვალა რამდენი ადამიანი ესწრება საკოორდინაციო საბჭოს მისი უწყებიდან.