დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, მიუხედავად ყოველდღიური მოწოდებისა, ქვეყანაში კორონავირუსის საწინააღმდეგო ვაქცინის პირველ დოზაზე დაჯავშნის კლების ტენდენცია შეინიშნება.

"ჩვენი ტიპის განვითარების არცერთ ქვეყანას ფაიზერის ამდენი დოზა არ ჰქონია, რაც ჩვენ გვაქვს. ხომ იყო მოთხოვნა ფაიზერზე, ახლა სექტემბერში შემოვედით დაახლოებით მილიონი დოზა ფაიზერით, ნახევარი მილიონი გახარჯულია უკვე, საიდანაც 700 000 არის თავისუფალი დოზა, 300 000 დაჯავშნილი დოზაა, ყოველდღე ამას ვეუბნებით მოსახლოებას, დაჯავშნეთ, დაჯავშნეთ. სამწუხაროდ, აცრის პირველ დოზაზე დაჯავშნის კლების ტენდენცია გაჩნდა ", — ამბობს გამყრელიძე პალიტრანიუსთან.

Stopcov.ge-ზე გამოქვეყნებული ინფორმაციის თანახმად, ამ დროისათვის სულ ჩატარდა 1 314 104 აცრა, დღიურად აცრილია — 22 733 ადამიანი.

5 სექტემბრის მონაცემებით, საქართველოში კორონავირუსის 2 210 ახალი შემთხვევა დადასტურდა, გამოჯანმრთელდა 5 587, ხოლო გარდაიცვალა — 74 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 564 837-ს, მათგან გამოჯანმრთელდა — 514 768, ხოლო ვირუსს ჯამში ემსხვერპლა 7 806 ადამიანი.