კულტურის მინისტრი, თეა წულუკიანი ჟურნალისტს კვლავ მიკროფონის წართმევით ემუქრება. მთავარი არხის იმერეთის ბიუროს ჟურნალისტის კითხვას, როდის დააბრუნებს წართმეულ მიკროფონს, მინისტრმა უპასუხა, რომ 3 ოქტომბერს.

"[მიკროფონს დავაბრუნებ] 3 ოქტომბერს, თქვენ თვითონ ნახეთ რას უკავშირდება ეს თარიღი. თქვენ კარგად მოიქეცით, თორემ ახლა ამ მიკროფონს დაკარგავთ".

22 ივლისს კულტურის მინისტრმა, თეა წულუკიანმა, მთავარი არხის ჟურნალისტს სამსახურეობრივი მოვალეობის შესრულებისას მიკროფონი წაართვა და მიმართა "ემა, მოდი, აბა თქვი, ბიძინას გაუმარ...". მინისტრს მიკროფონი ამ დრომდე არ დაუბრუნებია. ჟურნალისტმა აღნიშნულ ფაქტთან დაკავშირებით პოლიციას ადგილზე მიმართა, თუმცა საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ. მეორე დღეს მთავარმა არხმა მიკროფონის წართმევის ფაქტზე პროკურატურას მიმართა, თუმცა, გამოძიება არ დაწყებულა.