გირჩი მეტი თავისუფლების ლიდერი, ზურაბ ჯაფარიძე და ოპოზიციის ნაწილის ვიცე-მერობის კანდიდატი, ცოტნე კობერიძე მუნიციპალური ტრანსპორტის გადაადგილების შეზღუდვის მოხსნის მოთხოვნით, თბილისში საარჩევნო ნომრიანი ტრანსპორტით გადაადგილდებიან.

"როგორც ვიცით, მუნიციპალური ტრანსპორტის რეგულაცია ისევ გაგრძელდა. გადავწყვიტე ეს გამეპროტესტებინა რაიმე ფორმით, უბრალოდ, ქუჩაში დგომასა და პლაკატების ქნევას რომ არ ვეთანხმები, ვარჩიე ამ ფორმით რომ გამოვსულიყავით მინივენით, მე და ზურა და რამოდენიმე ათეული ადამიანი დღის განმავლობაში მაინც რომ გადავიყვანოთ უსასყიდლოდ, ეს მათ დაეხმარებათ გაძვირებული ტაქსის პირობებში, აკრძალული ტრანსპორტის პირობებში ა პუნქტიდან ბ პუნქტში შედარებით მარტივად გადავიდნენ. ამ ადამიანებს თან გზაში დაველაპარაკებით იმ იდეაზე, რა იდეის გამოც არ მოგვწონს, რაც ხდება",— ამბობს კობერიძე.

მისი თქმით, პროტესტის ეს ფორმა ამასთანავე კამპანიის ნაწილი იქნება.

"ვთვლით, რომ გადაადგილების თავისუფლების შეზღუდვა პანდემიის დროს, გაჭირვების დროს, განსაკუთრებით, როცა მუნიციპალურ ტრანსპორტს ეხება, არის ძალიან ცუდი რამე, რაც შეიძლება ადამიანს გაუკეთო. ამაზე ადამიანებს გავესაუბრებით, გირჩის ლოლიპოპებსაც დავურიგებთ და დღის განმავლობაში ქუჩაში ვივლით, ჩვეულებრივ ადამიანებს გავუჩერებთ, ვკითხავთ, სად მიდიან, ჩავისვამთ და იქამდე გადავიყვანთ. თან კამპანიის ნაწილი იქნება, თან რამდენიმე ათეულ ადამიანს მაინც შევუმსუბუქებთ დღეს და ასე გადავწყვიტეთ გავაპროტესტოთ ეს ამბავი", — განაცხადა ვიცე-მერობის კანდიდატმა.

ზურაბ ჯაფარიძის განცხადებით, მუნიციპალური ტრანსპორტის შეზღუდვის გამო მოქალაქეები იმაზე მეტს ხარჯავენ ამ დღეების განმავლობაში, ვიდრე აქვთ შემოსავალი.

"ამ ქვეყნის უამრავი მოქალაქე იმაზე მეტს ხარჯავს ამ დღეების განმავლობაში ტრანსპორტირებაზე, ვიდრე აქვს შემოსავალი, მაგრამ ამას აკეთებს იმის იმედად, რო სამსახური არ დაკარგოს. უბრალოდ, სხვა შემთხვევაში სამსახურში ვერ წავა, სამსახურის შემოსავალი დაეკარგება. მთავრობამ მინუსში გაუშვა ხალხი და ეს ადამიანები ამას ითმენენ მხოლოდ და მხოლოდ იმის გამო, რო სამსახური არ დაკარგონ. უკვე სამსახურის შოვნა ამ ქვეყანაში არის სერიოზული პრობლემა", — განაცხადა ჯაფარიძემ.

ცოტნე კობერიძის განცხადებით, ქუჩებში სიარულსა და მოსახლეობისთვის ტრანსპორტირების შეთავაზებას 3 დღის განმავლობაში აპირებენ.