თიბისი გაეროს ქალთა გაძლიერების პრინციპებს (WEPs) ოფიციალურად შეუერთდა. ამ გადაწყვეტილებით ბანკმა კიდევ ერთხელ დაადასტურა ქალთა უფლებებისა და გენდერული თანასწორობის მიმართ ერთგულება, რაც თიბისის კორპორაციული კულტურის განუყოფელი ნაწილია.

გაეროს ქალთა გაძლიერების შვიდი პრინციპი ერთგვარი გზამკვლევია მაღალი სოციალური პასუხისმგებლობის მქონე ბიზნესებისთვის, რომ დაიცვან სამუშაო სივრცეში და ჩვენს სოციუმში ქალთა და მამაკაცთა თანასწორი უფლებები, იზრუნონ მათ გაძლიერებაზე, ჯანმრთელობასა და მათთვის უსაფრთხო გარემოს შექმნაზე. პრინციპები სრულ თანხვედრაშია ადამიანის უფლებების, მათ შორის, შრომის უფლებების საერთაშორისო ნორმებთან.

ამ პრინციპებთან მიერთებით, თიბისი იღებს ვალდებულებას, რომ გამოიყენებს იმგვარ სამუშაო პრაქტიკას, რომელიც ქალებსა და მამაკაცებს თანაბრად აძლიერებს. ეს არის უდიდესი პასუხისმგებლობა კომპანიის მხრიდან, რომ თანასწორი, უსაფრთხო და ღირსეული გარემო შეუქმნას ყველა თანამშრომელს და მომხმარებელს.

აღსანიშნავია, რომ შვიდი პრინციპიდან სამი კომპანიის გარეთ საქმიანობას ეხება და საზოგადოებასა და მომხმარებელზე ზრუნვას ისახავს მიზნად. ამგვარი აქტივობებია საწარმოების მხარდაჭერა (ქალი მეწარმეების დაფინანსება), შესყიდვებისა და მარკეტინგის პრაქტიკის ამ პრინციპებთან შესაბამისობაში მოყვანა, სათემო ინიციატივები და სხვა საზოგადოებასა და მომხმარებელზე ორიენტირებული საქმიანობა.

„მოხარული ვარ, რომ თიბისი გაეროს ქალთა გაძლიერების პრინციპების ხელმომწერი კომპანია გახდა — ეს თიბისიში ქალების ეკონომიკური გაძლიერებისა და თანასწორობის უზრუნველყოფის მიმართულებით გადადგმული კიდევ ერთი ნაბიჯია. მთელი რიგი მიზნები დავსახეთ, რომელთა შესრულებასაც დიდი პასუხისმგებლობით ვეკიდებით. ამ პრინციპების კომპანიის საქმიანობაში ასახვა უამრავ შესაძლებლობას ქმნის. პირველ რიგში, ქალებისა და კაცების თანასწორობა თანამშრომლებისთვის უკეთეს სამუშაო გარემოს უზრუნველყოფს", — ამბობს ვახტანგ ბუცხრიკიძე, თიბისის გენერალური დირექტორი.

"ვფიქრობ, რომ ამ ნაბიჯის გადადგმის შემდეგ კიდევ მეტი ნიჭიერი ადამიანი დაინტერესდება თიბისის გუნდთან შემოერთებით, რაც გააძლიერებს ჩვენი კომპანიის კონკურენტუნარიანობას და ხელს შეუწყობს მდგრად განვითარებას. ჩვენი კომპანიისთვის ასევე პრიორიტეტულია ე.წ. ESG პრინციპების დაცვა, რაც ითვალისწინებს მდგრადი განვითარების, გარემოს დაცვისა და კარგი მმართველობის პრაქტიკის დანერგვას", — დაამატა მან.

გაეროს ქალთა გაძლიერების პრინციპები შემუშავდა გაეროს გლობალური შეთანხმებისა (UN Global Compact) და გაეროს ქალთა ორგანიზაციის (UN WOMEN) ერთობლივი ძალისხმევით. ბოლო თვეების მანძილზე თიბისიმ აქტიურად ითანამშრომლა გაეროს ქალთა ორგანიზაციასთან, რაც პრინციპების ხელმოწერით დასრულდა.