ჯანდაცვის მინისტრის, ეკატერინე ტიკარაძის განცხადებით, თბილისში, ქავთარაძის ქუჩაზე კიდევ ერთი საველე ჰოსპიტალი მოეწყო და იქ 200-მდე საწოლია მობილიზებული. ამის შესახებ მან ჟურნალისტებთან ისაუბრა.

"დედაქალაქში ერთ-ერთი მსგავსი ტიპის საველე ინფრასტრუქტურა გაიმართა, ასევე, ქავთარაძის ქუჩაზე, სადაც ერთ-ერთ ჰოსპიტალურ ნაწილში ჩვენ სრულიად ახალი 200 საწოლზე დაწესებულება გავმართეთ, სადაც გუშინ უკვე დაიწყო პაციენტების მიღება და დაახლოებით, 200-მდე პაციენტის მიღება შეიძლება, რომელიც უზრუნველყოფილი იქნება ჟანგბადით", — განაცხადა მან.

15 აგვისტოს ცნობილი გახდა, რომ დიღმის ოლიმპიური სოფლის ერთ-ერთ სპორტულ დარბაზში საველე ჰოსპიტალი მოეწყობოდა. თუმცა ტიკარაძის განმარტებით, ჯანდაცვის სამინისტრო გააკეთებდა ყველაფერს, რომ კორონავირუსის მართვა ჰოსპიტალურ სექტორში დარჩენილიყო და საველე ჰოსპიტლები უკიდურეს შემთხვევაში გამოიყენებინათ. ამის მიუხედავად, ჰოსპიტალმა პირველი პაციენტი 20 აგვისტოს მიიღო.