ამერიკელი სენატორების ორპარტიული ჯგუფი ქართული ოცნების მიერ მიშელის დოკუმენტის ანულირებასთან დაკავშირებით ერთობლივ განცხადებას ავრცელებენ და აცხადებენ, რომ საქართველოში ბოლო დროს განვითარებული მოვლენების გამო იმედგაცრუებულები არიან. განცხადების ავტორები არიან ჯინ შაჰინი, რონ ჯონსონი, ჯიმ რიში, ბენ კარდინი, რობ პორტმანი, კრის ვან ჰოლენი და ჯონ ბარასო.

"ძალიან იმედგაცრუებულები ვართ საქართველოში ბოლო დროს განვითარებული მოვლენების გამო, რომელიც ძირს უთხრის იმ რეფორმების ძალისხმევას, რასაც 19 აპრილის შეთანხმება ითვალისწინებდა. ამერიკის შეერთებული შტატები ევროკავშირთან პარტნიორობით მუშაობდა ქართულ პოლიტიკურ პარტიებთან ძლიერი, მრავალპარტიული შეთანხმების მისაღწევად, რომელიც გზას გაუხსნიდა სასამართლო და საარჩევნო რეფორმებს. იმედგამაცრუებელი იყო, რომ ყველა პარტიამ არ მოაწერა ამ შეთანხმებას ხელი ან კეთილსინდისიერად არ შეასრულა ის", — აცხადებენ სენატორები.

სენატორების განცხადებით, საქართველოში დემოკრატიის წინსვლაში მარცხმა შესაძლოა გამოიწვიოს დახმარების პირობითობა, საფრთხე შეუქმნას საქართველოს სწრაფვას ევროკავშირისა და NATO-ს წევრობისკენ და დააზიანოს აშშ-საქართველოს ორმხრივი ურთიერთობა, ასეთი შედეგით კი მხოლოდ კრემლი იხეირებს.

"ამ გადამწყვეტ დროს საქართველოს დემოკრატიული განვითარებისთვის, კიდევ უფრო იმედგამაცრუებელი იყო ის, რომ ქართულმა ოცნებამ გამოაცხადა, რომ განზრახვული აქვს ცალმხრივად გამოვიდეს 19 აპრილის შეთანხმებიდან. მმართველი პარტიიის ვალია, რომ განახორციელოს ინკლუზიური, მრავალპარტიული საპარლამენტო პროცესი, რომელიც ყველა ქართველს მოუტანს სარგებელს. როგორც ამერიკის შეერთებული შტატების კანონმდებლები, მოგიწოდებთ, თავისუფალი და სამართლიანი არჩევნების ჩატარებისკენ ოქტომბერში, კანონის უზენაესობის განმტკიცებისა და საარჩევნო, სასამართლო რეფორმების განხორციელებისკენ. საქართველოში დემოკრატიის წინსვლაში მარცხმა შესაძლოა გამოიწვიოს დახმარების პირობითობა, საფრთხე შეუქმნას საქართველოს სწრაფვას ევროკავშირისა და ნატოს წევრობისკენ და დააზიანოს აშშ-საქართველოს ორმხრივი ურთიერთობა. ასეთი შედეგით მხოლოდ კრემლი იხეირებს", — აცხადებენ ისინი.

ქართულმა ოცნებამ, 28 ივლისს პოლიტსაბჭოსა და უმრავლესობის სხდომების შემდეგ ბრიფინგი გამართა, სადაც განაცხადა, რომ ოპოზიციასთან ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. პარტიის თავმჯდომარემ ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.