მიუხედავად იმისა, რომ 5-6 ივლისს ძალადობის ორგანიზატორები და ბრძანების გამცემები შსს-ს ამ დრომდე არ დაუაკვებია, პრემიერმინისტრი ღარიბაშვილი ამტკიცებს, რომ ყველა მოძალადე დასჯილია.

"ყველა მოძალადე არის დასჯილი. ყველა მოძალადე არის დაჭერილი [...] ქუჩაში თუ რაღაც ჩხუბი მოხდა, ეს სახელმწიფომ აღკვეთა და ყველა მოძალადე დაიჭირა. აი, ეს არის მთავარი", — განაცხადა ირაკლი ღარიბაშვილმა.

პრემიერმინისტრი ცდილობდა თავი აერიდებინა ამ თემაზე საუბრისგან, ამიტომ ჟურნალისტებმა კითხვა რამდენჯერმე გაუმეორეს. ღარიბაშვილმა მათ უთხრა, რომ ეს იყო აგრესია და კითხვების დასმით ისინი ძალადობდნენ მასზე.

"თქვენ ახლა ძალადობთ ჩემზე, ძალადობთ, ეს არის ძალადობა. ეს არის აგრესია", — უთხრა მან ჟურნალისტებს.

შსს-ს 5-6 ივლისს ძალადობაში მონაწილე მხოლოდ 28 პირი ჰყავს დაკავებული, დაშავებულთა რაოდენობა კი 50-ზე მეტია. დაკავებულთაგან არცერთი არ არის ღირსების მარშის საწინააღმდეგო აქციების ორგანიზატორი.

აღსანიშნავია, რომ 16 ივლისს გამოკითხვაზე დაიბარეს ძალადობრივი და პრორუსული არხის, Alt-Info-ს დამფუძნებლები, ზურაბ მახარაძე და კონსტანტინე მორგოშია, ასევე პლატფორმის ყველა წევრი. მათ გარდა, გამოკითხვაზე იმყოფებოდნენ ძალადობრივი ჯგუფების ლიდერები, გურამ და ალექსანდრე ფალავანდიშვილებიც. გამოკითხვიდან გამოსვლის შემდეგ მათ დაადასტურეს, რომ გამომძიებელს კითხვები სწორედ ძალადობრივი აქციების ორგანიზებისა და ძალადობრივ მოწოდებებთან დაკავშირებით ჰქონდათ.

გამოკითხვისთის პოლიციის სამმართველოში გადაყვანამდე, პოლიციამ გაჩხრიკა ფალავანდიშვილების, მახარაძის, მორგოშიასა და Alt-Info-ს სხვა წარმომადგენლების სახლები. ცნობილია, რომ ამოიღეს რეგისტრირებული იარაღი, კომპიუტერები, ტელეფონები და სხვა პირადი ნივთები.

გამოკითხვიდან გამოსულმა გურამ ფალავანდიშვილმა განაცხადა, რომ გაუხარდა 5 ივლისს, დილით, პრემიერმინისტრის განცხადება, რომლითაც იგი მოუწოდებდა ღირსების მარშის ორგანიზატორებს გაეუქმებინათ ღონისძიება და მიანიშნებდა, რომ მისი ჩატარება დაპირისპირებას გამოიწვევდა.

13 ივლისს, პროკურორმა თამარ იაკობიძემ განაცხადა, რომ გამოძიება მუშაობს, მათ შორის, ძალადობის ორგანიზატორების დადგენის მიმართულებითაც. კითხვას, გაბედავს თუ არა პროკურატურა სისხლისსამართლებრივი დევნა დაიწყოს სასულიერო პირების წინააღმდეგ, იაკობიძემ უპასუხა, რომ სისხლისსამართლებრივი დევნა დაიწყება ყველა იმ პირის მიმართ, ვის მიმართაც იქნება შესაფერისი მტკიცებულებები.

გაიგე მეტი: