ინფექციური საავადმყოფოს დირექტორის, თენგიზ ცერცვაძის თქმით, მოსახლეობამ რეგულაციების მოხსნა "თავისებურად გაიგო".

"მოსახლეობამ ის სიგნალი მთავრობისგან, რომ მკაცრი შეზღუდვები მოხსნა, გაიგო თავისებურად. გაიგო იმით, რომ მათ ყველა ვალდებულება მოეხსნათ და აბსოლუტურად არ იცავენ არც ერთ დარჩენილ რეგულაციებს", — განაცხადა ცერცვაძემ.

კორონავირუსის ახალი შემთხვევების რაოდენობის ზრდას ცერცვაძე გაზრდილ მობილობასაც უკავშირებს.

"შემდეგი მიზეზი, რომ გაზრდილია მობილობა. ნახეთ თქვენ, საკურორტო ზონები გადავსებულია და შესაძლოა შემდეგი ზრდაც ვერ ავიცილოთ ამ პირობებში [...]

საქართველომ ან უნდა შემოიღოს ისევ შეზღუდვები, ან უნდა შეეგუოს ამ გაზრდილ რაოდენობასთან თანაცხოვრებას", — განაცხადა თენგიზ ცერცვაძემ.

18 ივლისის მონაცემებით, საქართველოში კორონავირუსის 1 286 ახალი შემთხვევა დადასტურდა, გამოჯანმრთელდა 1 701, ხოლო გარდაიცვალა — 13 ადამიანი. Stopcov.ge-ზე გამოქვეყნებული ინფორმაციის თანახმად დადებითობის დღიური მაჩვენებელი არის 5.26%.