კოალიცია მედიის ადვოკატირებისთვის პრემიერმინისტრ ირაკლი ღარიბაშვილს მოუწოდებს შეწყვიტოს მედიის დისკრედიტაცია. ასე გამოეხმაურა კოალიცია იმას, რომ ღარიბაშვილის ღონისძიებაზე სამ ტელევიზია — მთავარი არხი, TV პირველის და ფორმულა არ მიიწვიეს. On.ge-ს მთავრობის ადმინისტრაციაში უთხრეს. რომ ამ სამ არხს "კითხვებზე პასუხები არ აინტერესებს" და ისინი მუდმივად "დესტრუქციულად" იქცევიან. აღსანიშნავია, რომ ღონისძიებაზე არ იყო მიწვეული ონლაინმედიაც.

"კონკრეტული მედიასაშუალებების პრემიერის მონაწილეობით საჯარო ღონისძიებაზე გაშუქებაზე უკანონო შეზღუდვა ლახავს როგორც მედიის უფლებას განახორციელონ საკუთარი პროფესიული მოვალეობა, ასევე საზოგადოებას ართმევს შესაძლებლობას ინფორმაცია მიიღონ საჯარო ინტერესის შემცველი ღონისძიების შესახებ.

იმ ფონზე, როდესაც მედიის წარმომადგენლები არაერთი ძალადობისა და მუქარის მსხვერპლი არიან, პრემიერის დღევანდელი დისკრიმინაციული გადაწყვეტილება აძლიერებს ქვეყანაში არსებულ პოლარიზაციას, ახალისებს დამატებით ძალადობას, იძალადონ, დააშინონ, მტრულად ან დისკრიმინაციულად მოეპყრონ ჟურნალისტებსა და ოპერატორებს", — ვკითხულობთ კოალიციის განცხადებაში.

კოალიცია, ასევე, ეხმაურება მთავარი არხის დირექტორის, ნიკა გვარამიას მიმართ გავრცელებულ მუქარას და შინაგან საქმეთა სამინისტროს მოუწოდებს გამოძიება დაიწყოს.

"დღესვე ცნობილი გახდა, რომ მთავარი არხის დირექტორს ნიკა გვარამიას ძალადობრივ ჯგუფის წევრები ალტ-ინფოს Facebook-არხის დაბლოკვის გამო სიცოცხლის მოსპობით ემუქრებიან", — ვკითხულობთ კოალიციის განცხადებაში.

კოალიცია მედიის ადვოკატირებისთვის მოუწოდებს პრემიერმინისტრს, შეწყვიტოს მედიის დისკრედიტაცია, ასევე, შინაგან საქმეთა მინისტრს, ვახტანგ გომელაურს, დაიწყოს გამოძიება ნიკა გვარამიას მიმართ მუქარის შემცველი განცხადებაზე.

განცხადებას ხელს აწერენ:

  • საქართველოს ჟურნალისტური ეთიკის ქარტია;
  • საქართველოს ახალგაზრდა იურისტთა ასოციაცია;
  • საერთაშორისო გამჭვირვალობა-საქართველო;
  • სატელევიზიო ქსელი tv net;
  • მედიის განვითარების ფონდი MDF Media Development Foundation;
  • Alliance of Broadcasters - Georgia / რეგიონულ მაუწყებელთა ალიანსი;~
  • Media Rights • მედიის უფლებები;
  • Rights Georgia / უფლებები საქართველო;
  • ღია საზოგადოების ფონდი I Open Society Georgia Foundation;
  • სამართლიანი არჩევნები (ISFED);
  • საქართველოს დემოკრატიული ინიციატივა / Georgian Democracy Initiative;
  • საქართველოს მცირე და საშუალო სატელეკომუნიკაციო ოპერატორთა ასოციაცია
    მედიაკლუბი.

გაიგე მეტი: