შინაგან საქმეთა სამინისტროს ინფორმაციით, თელავის სამმართველოს თანამშრომლებმა 21 წლის პირი ოჯახში ძალადობის, ორი ან მეტი პირის მიმართ ჩადენილი ჯანმრთელობის განზრახ მძიმე დაზიანების და ქურდობის ბრალდებით დააკავეს.

უწყების ინფორმაციით, ბრალდებულმა ნაცნობ ქალს ფიზიკური შეურაცხყოფა მიაყენა. ხმაურის გამო სიტუაციაში ჩაერივენ მეზობლად მცხოვრები, 22 და 17 წლის ძმები, რომლებსაც ბრალდებულმა ბასრი საგნით სხეულზე დაზიანებები მიაყენა. შსს-ს ცნობით, ორივე დაჭრილი მამაკაცი გადაყვანილია კლინიკაში, სადაც შესაბამისი მკურნალობა უტარდებათ.

შსს-ში ამბობენ, რომ ბრალდებულმა მიმდინარე წლის ივნისსა და ივლისში, ქალაქ თელავში სასურსათო მაღაზიები გაქურდა.

გამოძიება საქართველოს სსკ-ის 117-ე მუხლის მე-7 ნაწილის ა ქვეპუნქტით, 126-ე პრიმა მუხლის 1-ლი ნაწილით და 177-ე მუხლის მე-2 ნაწილის ბ ქვეპუნქტით მიმდინარეობს, რაც ჯანმრთელობის განზრახ მძიმე დაზიანებას, ოჯახში ძალადობას და სადგომში ან სხვა საცავში უკანონო შეღწევით ჩადენილ ქურდობას გულისხმობს.

დანაშაულები 9-დან 13 წლამდე ვადით თავისუფლების აღკვეთას ითვალისწინებს.