Nexta-ს ყოფილი რედაქტორი, რომელიც Ryanair-ის თვითმფრინავის საგანგებო დასმის შემდეგ მინსკში დააკავეს, შინაგანან საქმეთ სამინისტროს პრესკონფერენციაზე მიიყვანეს. პროტასევიჩმა პრესკონფერენციაში მონაწილეობა მიიღო და ჟურნალისტების კითხვას უპასუხა.

"თავს კარგად ვგრძნობ, შესანიშნავ განწყობაზე ვარ. არანაირი ჩივილები არ მაქვს. არავინ მირტყამდა, თითიც არ დაუკარებიათ. გთხოვთ, რაც შეიძლება ნაკლები სპეკულაცია გაავრცელოთ ჩემი ჯანმრთელობის შესახებ. დედა, მამა, არ ინერვიულოთ, ყველაფერი მართლა კარგად მაქვს", — განაცხადა პროტასევიჩმა.

პროტასევიჩმა განაცხადა, რომ მხარს არ უჭერს მოქმედ პრეზიდენტ ალექსანდრ ლუკაშენკოს, თუმცა "პატივს სცემს, როგორც ადამიანს".

როგორც Meduza წერს, პრესკონფერენციაზე მყოფი ჟურნალისტების ნაწილმა პროტასევიჩის გულწრფელობაში ეჭვი შეიტანა. BBC-ს წარმომადგენლებმა კი პროტესტის ნიშნად დარბაზი დატოვეს.

საგამოძიებო ორგანოების წარმომადგენელმა, დმიტრი გორამ აღნიშნა, რომ პროტასევიჩის წინააღმდეგ საქმე სამი მუხლითაა აღძრული: სოციალური მტრობისა გაღვივება, მასობრივი არეულობის ორგანიზება და ისეთი ქმედებების ორგანიზება, რომელიც საზოგადოებრივ წესრიგს არღვევს. პროტასევიჩის შეყვარებულს, სოფია საპეგას კი, რომელიც მასთან ერთად დააკავეს, მტრობის გაღვივებასა და მასობრივ არეულობაში მონაწილეობას ედავებიან.

ივნისის დასაწყისში პროტასევიჩის ინტერვიუ გავრცელდა, რომელიც მან ადგილობრივ სახელისუფლებო არხს მისცა. ჟურნალისტის ახლობლები და მეგობრები ეჭვობდნენ, რომ ის წამებისა და ზეწოლის მსხვერპლია და ინტერვიუც სწორედ ზეწოლის ქვეშ ჩაწერა.