ქართული ოცნების დეპუტატი, შალვა პაპუაშვილი აცხადებს, რომ ოპოზიციამ პარლამენტში შესვლით თამამი ნაბიჯი გადადგა და მოუწოდებს, ამნისტიის კანონის მხარდაჭერით მეორე თამამი ნაბიჯიც გადადგან.

"ოპოზიციურ პარტიებს, რომლებიც შემოვიდნენ პარლამენტში და მუშაობენ ჩვენთან ერთად ამნისტიაზე, მოვუწოდებ ერთ რამეს, რომ მათ ერთი თამამი ნაბიჯი უკვე გადადგეს იმით, რომ შემოვიდნენ, გამოიარეს ის კორიდორი, რომელიც მათივე მხარდამჭერებმა მოუწყვეს საბოლოო ჯამში მათ. ეს არის ის ტრაგიკული დასასრული მათვე პროტესტისა, რაც ჩვენ გუშინ ვიხილეთ — ის, რასაც ისინი სკანდირებდნენ, საბოლოო ჯამში საკუთარი ყურებით, საკუთარი მისამართით მოისმინეს. ამიტომ, ეს ერთი თამამი ნაბიჯი გადადგეს, ახლა გადადგან მეორე თამამი ნაბიჯი", — განაცხადა შალვა პაპუაშვილმა.

მისი თქმით, ოპოზიცია იმიტომ არ უჭერს მხარს ქართული ოცნების მიერ წარმოდგენილი ამნისტიის ვერსიას, რომ "ხდება მათი დამუნათება".

"ეს დღეები ვცდილობთ მათთან კონსულტაციას, რომ გვქონდეს საერთო პროექტი და ყოყმანობენ მაინც გარკვეულწილად, როგორც ჩანს და ეს პირდაპირ ჩანს პრინციპში, რომ მათ აქვთ გარკვეული შეზღუდვები, გარკვეული დისკომფორტი, გამომდინარე იქედან, რომ ხედავენ იმ ტალღას, მომდინარეობს, განსაკუთრებით ზოგიერთი მედიასაშუალების მხრიდან თუ პარტიებიდან, როდესაც ხდება მათი დამუნათება. ეს დღეები პირდაპირ ცეცხლი იყო გახსნილი მათზე, რომ როგორ ბედავთ, რომ ამნისტიას დაუჭირეთ მხარი და ა.შ.", — განაცხადა პაპუაშვილმა.

ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის იმ ნაწილმა, სადაც 20 ივნისის საქმეზე ბრალდებულების ამნისტიაზეა საუბარი, პოლიტიკურ სპექტრში აზრთა სხვადასხვაობა გამოიწვია.

მმართველი პარტია და ოპოზიცია ვერ თანხმდება კონკრეტულად რომელ მუხლებს უნდა შეეხოს ამნისტია. გარდა ამისა, დისკუსიებია იმაზე, ამნისტია მხოლოდ მიმდინარე საქმეებს უნდა შეეხოს თუ იმათაც, რომელიც 20 ივნისთან დაკავშირებით მომავალში დაიწყება. სავარაუდოა, რომ ამნისტიის შესახებ კანონპროექტის ორი ვერსია დაინიცირდება — ერთი ქართული ოცნების და მეორე, ოპოზიციის.

გაიგეთ მეტი: