ორგანიზაცია საფარი ქობულეთში გარდაცვლილი 14 წლის ბავშვის საქმეში ჩაერთვება და დედის, მერი ცეცხლაძის ინტერესებს დაიცავს. როგორც ორგანიზაციის წარმომადგენელმა, ბაია პატარაიამ განაცხადა, დღეს პროკურატურას მიმართეს, რომ დაზარალებულის უფლებამონაცვლის სტატუსი დის ნაცვლად, დედას მიენიჭოს.

საფარიმ მას შემდეგ გადაწყვიტა ჩართვა, რაც საქმეს ორგანიზაცია პარტნიორობა ადამიანის უფლებებისთვის, დაზარალებულის უფლებამონაცვლის გადაწყვტილების საფუძველზე ჩამოშორდა. საფარის განცხადებით, ქობულეთში გარდაცვლილი ბავშვის დამ ეს გადაწყვეტილება, შესაძლოა, ზეწოლის საფუძველზე მიიღო.

"ნინის დედა, ქალბატონი მერი ცეცხლაძე ფიქრობს, რომ დაზარალებულის უფლებამონაცველეზე, თამარ ცეცხლაძეზე ხორციელდება ზეწოლა და სწორედ ამიტომ, მან უარი თქვა არასამთავრობო ორგანიზაციის დახმარებაზე, არ ახსნა საკუთარი გადაწყვეტილება არაფრით, რაც კიდევ უფრო ამყარებს ეჭვებს, რომ გარკვეული ზეწოლა ხორციელდება და სწორედ ამიტომ, ის ამბობს, რომ კმაყოფილია გამოძებით. შეუძლებელია, ამ გამოძებით ვინმე იყოს კმაყოფილი იმდენ დარღვევაზეა საუბარი", — თქვა მან.

პატარაია ამბობს, რომ არასამთავრობო ორგანიზაციის ჩამოშორება საქმიდან აზრიანებს, როგორც უშულოდ საქმეს, ასევე, ზოგადად ქალთა და გოგონათა უფლებრივ მდგომარეობას საქართველოში. ამასთან, მისი თქმით, საქართველოს კანონმდებლობიდან გამომდინარე, იმედი არა აქვთ, რომ პროკურატურა მათ მოთხოვნას დააკმაყოფილებს, თუმცა ისინი ბრძოლას გააგრძელებენ, რომ საქმეზე შესაბამისი გადაწყვეტილება დადგეს.

"გარდა იმისა, რომ გამოძიება მიდის სერიოზული ხარვეზებით, ასევე, ჯერ კიდევ დანაშაულის კვალიფიკაცია არ არის გასწორებული. მოგეხსენებათ, რომ დარგის ექსპერტებს, არასამთავრობო ორგანიზაციებს მიგვაჩნია, რომ ამ საქმეში ძალიან მკაფიოდ იკვეთება გაუპატიურების დანაშაულის ნიშნები, თუმცა ამ მუხლით გამოძება არ მიმდინარეობს.

ჩვენ გვინდა, საზოგადოებას მივმართოთ და ვაცნობოთ, რომ მიუხედავად იმისა, მოხდა დაზარალებულის უფლებამონაცვლის მიერ არასამთავრობო სექტორის ჩახსნა ამ ძალიან მნიშვნელოვანი საქმიდან, ჩვენ შევეცდებით, რომ ალტერნატიული გზებით ჩავერთოთ. ამ შემთხვევაში, საფარი გააგრძელებს ბრძოლას", — განაცხადა პატარაიამ.

რაც შეეხება დაზარალებულის უფლებამონაცვლის გადაწყვეტილებას, საფარი აცხადებს, რომ ეს შესაძლოა ყოფილიყო როგორც ოჯახის წევრების, ასევე, სკოლის მხირდან განხორციელებული ზეწოლის შედეგი.

"ამ საქმეში არის ძალიან ბევრი პრობლემა და ძალიან ბევრი ფიგურანტი. გარდა იმისა, რომ გვყავს სექსუალურად მოძალადე, ჩვენ გვყავს ოჯახში მოძალადე ადამიანები. ბაბუა და მისი ძმისშვილები. ასევე, დგება სკოლის პასუხისმგებლობა, ვინაიდან იკვეთება, რომ იყო ადამიანი, რომელიც არის ერთ-ერთი ბიძის ცოლი, რომელიც ჩართულია ამ საქმეში. ამიტომ ზეწოლა შესაძლოა ხორციელდებოდეს მრავლამხრივად, ვინაიდან საქმეში ძალიან ბევრი ფიგურანტი არსებობს", — თქვა პატარაიამ.

22 აპრილს, PHR ქობულეთში გარდაცვლილი 14 წლის ბავშვის საქმეს ჩამოშორდა. 11 თებერვალს შინაგან საქმეთა სამინისტრომ გაავრცელა ინფორმაცია, რომ ქობულეთში 24 წლის კაცი დააკავეს, რომელმაც 14 წლის ბავშვთან სქესობრივი კავშირი დაამყარა. 14 წლის ბავშვმა 10 თებერვალს თავი მოიკლა. საგამოძიებო უწყებამ ბრალდებული მხოლოდ ბავშვის თვითმკვლელობის შემდეგ დააკავა.

ამავე თემაზე: