დაავადებათა კონტროლის ცენტრის დირექტორის, პაატა იმნაძის განცხადებით, 28 აპრილის მონაცემებით, სინოფარმის ვაქცინაზე დარეგისტრირებული 6 700-ზე მეტი ადამიანიდან 4 500-მდე თბილისშია დარეგისტრირებული.

"დღეს დილის მონაცემებით, 6 700-ზე მეტმა ჩვენმა თანამოქალაქემ გაიარა რეგისტრაცია 15 რიცხვამდე. ჯერჯერობით პორტალი გახსნილია 15 მაისამდე ასე, რომ ძალიან აქტიურად დაიწყო რეგისტრაცია ამ ვაქცინაზე, რაც სასიხარულოა იმიტომ, რომ ჩვენ მოქალაქეები ხვდებიან თუ რა ძალიან მნიშვნელოვანია ამ ეტაპზე ვაქცინაცია რაც შეიძლება მეტმა ადამიანმა ჩაიტაროს ქვეყანაში. განსაკუთრებით აქტიურია ისევ და ისევ თბილისი, 4 500-მდე ადამიანია თბილისში დარეგისტრირებული უკვე", — განაცხადა იმნაძემ.

თბილისში ჩინური ვაქცინის, Sinopharm-ისთვის განკუთვნილი ადგილები სრულად დაჯავშნილია. რეგისტრაცია დღეს, 27 აპრილს 20:00 საათზე დაიწყო და 2 საათში შეივსო.

ვიზიტების დაჯავშნა 4-დან 15 მაისამდე პერიოდში იყო შესაძლებელი.

ვებგვერდ Booking.moh.gov.ge-ს მონაცემებით, ამ ეტაპზე მხოლოდ რეგიონებში რეგისტრაციაა შესაძლებელი, დედაქალაქში კი ყველა ვიზიტი დაჯავშნილია.

ჯანდაცვის სამინისტროს ინფორმაციით, სინოფარმის ვაქცინა 35 ქვეყანაშია აღიარებული და ჩინეთის მწარმოებლებს 200 მილიონზე მეტი დოზა აქვთ გაცემული. თუმცა, ამ ეტაპზე ვაქცინას არ აქვს ჯანდაცვის მსოფლიო ორგანიზაციის აღიარება.

გასცემს თუ არა ორგანიზაცია Sinopharm-ის გამოყენების ნებართვას ამ კვირის ბოლოს გახდება ცნობილი, Sinovac Biotech-თან დაკავშირებით კი იგივე ინფორმაციას მომდევნო კვირის ბოლოს მივიღებთ. ამის შესახებ WHO-ს ასისტენტ-დირექტორმა, მარიანგელა ბატისტა გალვაო სიმაომ, ორშაბათს განაცხადა.