ქართული ოცნების თავმჯდომარის, ირაკლი კობახიძის განცხადებით ნაციონალური მოძრაობის თავმჯდომარის, ნიკა მელიას გადასაწყვეტია მიიღებს თუ არა "პატიებას" ქართული ოცნების მხრიდან. ამის შესახებ მან იმედთან განაცხადა.

"ყველაზე მძიმე დანაშაული 20 ივნისის ღამეს აქვს სწორედ მას [ნიკა მელიას] ჩადენილი. აქედან გამომდინარე, თუ ამნისტია შეეხება ნიკა მელიას, ბუნებრივია, ეს უნდა შეეხოს ყველა სხვასაც, ვისაც შეიძლება რამე დანაშაული ჰქონდეს ჩადენილი ამ ღამეს. [...] ქართულმა ოცნებამ უკვე გამოხატა საკუთარი ნება, აპატიოს ნიკა მელიას უმძიმესი დანაშაული. ეს არის ჩვენი პოლიტიკური გადაწყვეტილება, ეს არის უკვე ნიკანორ მელიაზე. მან შეუძლია მიიღოს ან არ მიიღოს ეს პატიება ქართული ოცნების მხრიდან", — განაცხადა ირაკლი კობახიძემ.

ევროპული საბჭოს პრეზიდენტის, შარლ მიშელის ინიციატივით შექმნილი დოკუმენტის იმ ნაწილზე, სადაც 20 ივნისის საქმეზე ბრალდებულების ამნისტიაზეა საუბარი, განსხვავებული ინტერპრეტაციები ვრცელდება.

სტრატეგია აღმაშენებლის ლიდერმა, გიორგი ვაშაძემ განაცხადა, რომ ამნისტია არ შეეხებათ მათ, ვინც უკვე არაა მიცემული სისხლის სამართლებრივ პასუხისგებაში. რაც შეეხება სამართალდამცველებისთვის ამნისტირებას, ქართული ოცნების ლიდერები ამბობენ, რომ იგი სამართალდამცველებსაც უნდა შეეხოთ, ოპოზიცია ამას ეწინააღმდეგება. ამ ამბავს გამოეხმაურნენ თავად 20 ივნისს დაზარალებულები, რომელებიც ამბობენ, რომ პარტიებს არ აქვთ უფლება გადაწყვიტონ, შეწყდეს თუ არა საქმეების განხილვა.

სამართალდამცველები ამნისტირებას დაუშვებლად მიიჩნევენ საქართველოს ახალგაზრდა იურისტთა ასოციაცია და ადამიანის უფლებათა ცენტრი — ორგანიზაციები, რომლებიც 20 ივნისს დაზარებული მოქალაქეებისა და ჟურნალისტების ინტერესებს იცავენ როგორც საქართველოში, ისე ადამიანის უფლებათა ევროპულ სასამართლოში.

გაიგეთ მეტი: