გირჩი — მეტი თავისუფლების ლიდერი, ზურაბ ჯაფარიძე ამბობს, რომ შარლ მიშელის მიერ წარმოდგენილი ახალი დოკუმენტი წინა ვერსიას ბევრად სჯობს, თუმცა ის მაინც არ მოსწონს. ამასთან, იგი აღნიშნავს, რომ პოლიტპატიმრებთან დაკავშირებით უფრო გასაგები მექანიზმებია გაწერილი.

"ზოგადად, დოკუმენტი არ მომწონს. არ მჯერა, რომ ეს დოკუმენტი ქვეყანას კრიზისიდან გამოიყვანს. არც წინა დოკუმენტზე მჯერა, არც ამაზე მჯერა, თუმცა აქ კარგი ისაა, რომ პოლიტპატიმრების გათავისუფლება არის, მექანიზმი უფრო კარგად არის გაწერილი", — ამბობს ჯაფარიძე და ამატებს, რომ ჯერ გადაწყვეტილი არ აქვს, მოაწერს თუ არა დოკუმენტს ხელს.

ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სვხა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: