რესპუბლიკური პარტიის ლიდერი, ხათუნა სამნიძე ამბობს, რომ ახალი დოკუმენტი, რომელიც ევროპის საბჭოს პრეზიდენტმა, შარლ მიშელმა წარმოადგინა პოზიტიური პროგრესია და მზად არიან მას ხელი მოაწერონ. მისივე თქმით, ევროკავშირის წარმომადგენლობაში შეხვედრისას მათ პირდაპირი ჩართვა ჰქონდათ ბრიუსელთან.

შეხვედრის შემდეგ სამნიძემ განაცხადა, რომ დოკუმენტში ვადამდელ არჩევნებსა და პოლიტპატიმრების გათავისუფლებაზეა საუბარი.

"აქ უკვე არის კონკრეტული ჩანაწერი, როგორ შეიძლება მივიდეთ ვადამდელ არჩევნებამდე და რაც მთავარია საკითხი, რომელზეც კომპრომისი შეუძლებელი იყო, ეს არის ორი პოლიტიკური პატიმრის გათავისუფლება. ჩანაწერი არის მკაფიო და საუბარია ორ საქმეზე და არის კონკრეტული გზები როგორ უნდა გათავისუფლდნენ უახლოეს დღეებში ორივე მაგათი. დანარჩენი სამი საკითხის გათვალისწინებით, რომელზეც აქამდე ვიყავით შეთანხმებული, მე შემიძლია ვთქვა რესპუბლიკური პარტიის სახელით, რომ პოზიტიურად ვართ განწყობილნი და მზად ვართ, ხელი მოეწეროს ჩვენი მხრიდან ამ დოკუმენტს, მაგრამ ამისთვის საჭიროა, რომ ხელისუფლების მხრიდან მზაობა", — აღნიშნა სამნიძემ.

მისივე თქმით, მათ მთელი დღის განმავლობაში იცოდნენ, რომ შეხვედრა ორმხრივი უნდა ყოფილიყო, თუმცა ქართული ოცნება არ მივიდა.

ოპოზიციური პარტიის ლიდერების განცხადებით, შეხვედრაზე მათ ახალი დოკუმენტი წარუდგინეს და გადაწყვეტილება შიდაპარტიული მსჯელობის შემდეგ უნდა მიიღონ

ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სვხა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: