აქტივისტ ირაკლი ფანგანზე ძალადობის ბრალდებით ერთი პირი დააკავეს. დანაშაული 1 წლამდე ვადით თავისუფლების აღკვეთას ითვალისწინებს.

გამოძიების ინფორმაციით, 4 აპრილს ფანგანს თბილისში, რუსთაველის გამზირზე სიტყვიერი შეურაცხყოფა მიაყენეს და ფიზიკურად იძალადეს. გამოძიება სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს.

ირაკლი ფანგანმა გამოცემა ბათუმელებს უთხრა, რომ უცნობმა კაცმა ქაშუეთის ეკლესიის წინ ბათუმის ინციდენტი გაუხსენა, რის შემდეგაც ცემა დაუწყო. მისივე თქმით, კლინიკაში მას ტვინის შერყევა დაუდგინეს.

23 იანვარს, ირაკლი ჩავლეიშვილს, რომელიც აჭარის უმაღლეს საბჭოში ოპოზიციის სიით შევიდა, ირაკლი ფანგანმა ქუჩაში ნაგავი დააყარა. როგორც ალტერნატივის მიერ გავრცელებულ ვიდეოკადრებში ჩანს, მოქალაქეები ჩავლეიშვილს ქუჩაში შეხვდნენ. ისინი "მონა, მოღალატეს" სკანდირებდნენ და ეუბნებოდნენ, რომ საბჭოში გაყალბებული მანდატით შევიდა.

სამართალდამცველებმა ფანგანი მეორე დღეს დააკავეს. მას 2 000-ლარიანი გირაო შეუფარდეს. გირაოსთან ერთად ფანგანს საზღვრის გადაკვეთა, დაზარალებულთან მიახლოება და კომუნიკაცია აეკრძალა და ასევე, გამომძიებელთან კვირაში ერთხელ გამოცხადება დაევალა.