2020 წლის ადამიანის უფლებებისა და თავისუფლებების შესახებ სახალხო დამცველის წლიურ ანგარიშში წერია, რომ მაღალკვალიფიციური დამხმარე სამედიცინო პერსონალის სიმცირე პანდემიის ფონზე კიდევ უფრო მწვავედ გამოვლინდა. დოკუმენტში, ასევე, აღნიშნულია, რომ პაციენტთა უფლებების დაცვის მექანიზმების არაეფექტიანობის პრობლემა გადაუჭრელი დარჩა.

"პანდემიის ფონზე კიდევ უფრო მწვავედ გამოვლინდა მაღალკვალიფიციური დამხმარე სამედიცინო პერსონალის სიმცირე. გატარებული რიგი ღონისძიებების მიუხედავად, კვლავ გართულებული იყო მოსახლეობის წვდომა ხარისხიან და იაფფასიან მედიკამენტებზე, ასევე, ერთიანი სახელმწიფო პროგრამა ონკოლოგიური პაციენტების სამკურნალოდ კვლავ არ შემუშავებულა, მათ შორის, პრევენციის და რეაბილიტაციის მიმართულებებით", — ვკითხულობთ ანგარიშში.

სახალხო დამცველი ნარკოპოლიტიკის არსებითი ცვლილების აუცილებლობაზე, მკურნალობასა და რეაბილიტაციაზე დაფუძნებულ მოდელზე გადასვლის საჭიროებაზე ყურადღებას კვლავ ამახვილებს.