პირადი ცხოვრების კადრების საქმეზე საქართველოს ახალგაზრდა იურისტთა ასოციაცია ეკა ბესელიას ინტერესებს დაიცავს. როგორც ორგანიზაციაში აცხადებენ, საქართველოს ხელისუფლება მიზანმიმართულად არიდებს თავს ამგვარი დანაშაულების დროულ და ეფექტიან გამოძიებას, რითიც ადასტურებს იმას, რომ არ აქვს პოლიტიკურ ნება, აღიკვეთოს ფარული ჩანაწერებით შანტაჟის პრაქტიკა.

საია-ში მიაჩნიათ, რომ ეკა ბესელიას საქმე ერთ-ერთი ის შემთხვევაა, რომელიც ნათლად წარმოაჩენს პირადი ცხოვრების ამსახველი კადრებით შანტაჟისა და აღნიშნულ ფაქტებზე სახელმწიფო ორგანოების არაქმედითი რეაგირების სისტემურ პრობლემას.

2019 წლის იანვარში ინტერნეტ სივრცეში გავრცელდა ეკა ბესელიას პირადი ცხოვრების საიდუმლოების ამსახველი კადრები. აღნიშნული საქმის გამოძიება 2019 წლის 28 იანვარს დაიწყო, თუმცა პროკურატურის მიერ პასუხისგებაში მიცემული არიან მხოლოდ ის პირები, რომლებმაც შეინახეს ან/და გაუზიარეს სხვა პირებს აღნიშნული ჩანაწერი. ხოლო ის პირები, რომლებიც პირდაპირ მონაწილეობდნენ აღნიშნული ჩანაწერის შექმნაში და გავრცელების პირველწყაროს წარმოადგენენ, დღემდე არ არიან იდენტიფიცირებულნი.

2021 წლის 01 აპრილს საია ეკა ბესელიას საქმეში ჩაერთო, როგორც დაზარალებულის ინტერესების დამცველი ორგანიზაცია. საია-ში აღნიშნავენ, რომ კრიტიკულად აუცილებელია, დაისაჯოს პირველწყარო, და ხელისუფლებამ დაადასტუროს, რომ არ აფარებს/უწყობს ხელს ამგვარ შემაშფოთებელ დანაშაულებს.