შსს-ს წარმომადგენლის თქმით, სასტუმროში, სადაც რუსი პროპაგანდისტი ჟურნალისტი ვლადიმერ პოზნერი და მისი თანხმლები პირები იკრიბებიან, შრომის ინსპექციის წარმომადგენელთან ერთად დასაჯარიმებლად შედიან. ასე განუხადა მან ადგილზე მყოფ ელენე ხოშტარიას მას შემდეგ, რაც პოლიტიკოსმა 112-ში დარეკა და კომენდანტის საათის დარღვევაზე რეაგირება მოითხოვა.

ხოშტარიამ ოპერატორს უთხრა, რომ პოლიცია იქვე იყო და რეაგირება არ ჰქონდა. სწორედ ამის შემდეგ მიმართა მას შსს-ს წარმომადგენელმა:

"შინაგან საქმეთ სამინისტრო შრომის ინსპექციასთან ერთად შედის აღნიშნულ ობიექტზე დაჯარიმების მიზნით. დანარჩენს შიგნით გავერკვევით ვითარებაში და მოგახსენებთ".

ხოშტარიას კითხვაზე, რა რეაგირება ექნება უწყებას იმაზე, რომ აღნიშნულმა პირებმა კომენდანტის საათი დაარღვიეს და ისინი პოლიციის ესკორტით მოვიდნენ, ის პასუხობს:

"ვინც დაარღვევს გადაადგილების შეზღუდვის მოთხოვნებს და დარღვეული აქვს გადაადგილების შეზღუდვა, ყველაზე მივიღებთ შესაბამის ზომებს".

ვლადიმერ პოზნერი საქართველოში დაბადების დღის აღსანიშნად ჩამოვიდა. ვრცელდება ინფორმაცია, რომ მან, თანმხლებ პირებთან ერთად გადაადგილების შეზღუდვა დაარღვია და ჯერ კაფეში, ახლა კი სასტუმროში რესტორანში ქეიფობს და რეგულაციებს არღვევს.

რუსი პროპაგანდისტის ვიზიტის გასაპროტესტებლად სასტუმროსთან აქცია იმართება. აქტივისტები მის წასვლას მოითხოვენ და ანტიოკუპაციურ გზავნილებს აჟღერებენ. ასევე, ამბობენ, რომ სახელწმიფოს უნდა ჰქონდეს რეაგირება კრემლის პროპაგანდისტების ვიზიტზე.

ადგილზე მობილიზებულია პოლიცია. ერთ-ერთი სამართალდამცავის განცხადებით, ხმაურზე გამოიძახეს და ამიტომ მივიდნენ.

პოზნერი რუსეთის სახელმწიფო პროპაგანდისტული არხის, პერვი კანალის წამყვანია. სხვადასხვა დროს მას ჰქონია გადაცემები, სადაც რუსული ნარატივი ტარდებოდა და განიხილავდნენ, რომ საქართველო ცალკე არაფერს წარმოადგენს და "რუსეთის მშვენებაა", მაგრამ ახლა, როცა დამოუკიდებელია, "საცოდავად" გამოიყურება. ამ აზრს ეთანხმებოდა პოზნერიც.

ამავდროულად, მას აქვს გაკეთებული არაერთი განცხადება საქართველოს ოკუპირებულ რეგიონებზე. მაგალითად, აგვისტოს ომის დაწყებაში, როცა რუსეთმა ცხინვალის რეგიონის ოკუპაცია მოახდინა, ის საქართველოს ადანაშაულებდა.

"პირველ რიგში, საქართველო დაესხა თავს სამხრეთ ოსეთს და არა პირიქით. ეს ყველამ იცის, რომ პირველი სროლები საქართველოს მხრიდან იყო", — ამბობდა ის და ატარებდა კრემლის ნარატივს იმაზე, რომ მათ ჯარებს თბილისამდე ჩასვლა შეეძლოთ, მაგრამ შეჩერდნენ.

გარდა ამისა, პოზნერი ამტკიცებდა, რომ აფხაზები ოცნებობდნენ საქართველოსგან გამოყოფას, რადგან ქართველები მათ დამაკნინებლად ექცეოდნენ.

2006 წელს პოზნერი ვლადიმერ პუტინმა მამულის წინაშე განსაკუთრებული ღვაწლისთვის დააჯილდოვა. მაშინ მიზეზად რუსული ტელე-რადიოს განვითარებისთვის გაწეული შრომა დასახელდა.