ერთიანი ნაციონალური მოძრაობის ერთ-ერთი ლიდერის, სალომე სამადაშვილის განცხადებით, თუ კი ევროპული საბჭოს პრეზიდენტ შარლ მიშელის მიერ შემოთავაზებული 6-პუნქტიანი გეგმიდან რომელიმე "უგულებელყოფილი" იქნება, შეთანხმება არ შედგება.

"თუ მხარეები არ წავიდნენ კომპრომისზე, შეთანხმება ვერ შედგება. ქართული ოცნების საჯარო განცხადებები უკანასკნელ დღეებში არ აჩენს მოლოდინს ამ კომპრომისისთვის, მაგრამ, ცხადია, ჩვენ დაველოდებით იმ დოკუმენტს, რომელსაც გაგვაცნობს მედიატორი და ვნახავთ, რა იქნება ამ შემოთავაზებულ დოკუმენტზე, ასევე, ქართული ოცნების პოზიცია. [...] ყველა საკითხი, რომელიც არის მოცემული მიშელის გეგმაში, არის მნიშვნელოვანი როგორც პოლიტპატიმრებისა და პოლიტიკური მართლმსაჯულების თემა, ასევე, არჩევნების თემა და ყველა სხვა საკითხი. ასე რომ, ჩვენ ვერ მივაღწევთ შეთანხმებას, პირდაპირ შემიძლია გითხრათ, თუ მოხდა მიშელის გეგმაში დაფიქსირებული საკითხებიდან რომელიმე საკითხის უგულებელყოფა შემოთავაზებულ დოკუმენტში", — განაცხადა სამადაშვილმა.

ევროპული საბჭოს პრეზიდენტ შარლ მიშელის წარმომადგენელთან, კრისტიან დანიელსონთან ქართული ოცნებისა და ოპოზიციის შეხვედრა დღეს 1 საათით გადაიდო.

დანიელსონის მედიაციით მხარეებს შორის შეხვედრა დღეს 16:00 საათზე იყო დაგეგმილი. მანამდე ის საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო.

დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო პოლიტიკურ პარტიებს 29 მარტს შეხვდა. შეხვედრის შემდეგ მან განაცხადა, რომ 30 მარტს, ქართულ ოცნებასა და ოპოზიციას შორის დაგეგმილ საერთო შეხვედრაზე წარადგენს დოკუმენტს, რომელსაც შეთანხმების შემთხვევაში მხარეებმა ხელი უნდა მოაწერონ.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.