ოკუპირებული აფხაზეთის დე ფაქტო შინაგან საქმეთა სამინისტრომ მოკვლევა დაიწყო 19 წლის გოგოს წინააღმდეგ, რომელიც TitTok-ზე გამოქვეყნებულ ვიდეოში ამბობს, რომ აფხაზეთი საქართველოა. ის ე.წ. შსს-ში დაიბარეს და ბოდიში მოახდევინეს.

მისი თქმით, ვიდეოს განთავსება სთხოვეს და ახლა ნანობს, რაც გააკეთა. თუმცა დე ფაქტო უწყების მიერ გავრცელებულ ჩანაწერში არ ჩანს, ვინ სთხოვა ეს.

"მე მთხოვეს. ყველას ვთხოვ პატიებას, ძალიან ვწუხვარ", — ამბობს გოგო ე.წ. შსს-ს მიერ გავრცელებულ ვიდეოში.

დაკითხეს, ასევე, ალიონას მშობლები. ვიდეოში ისმის, რომ მათ ეკითხებიან, როგორ შეაფასებდნენ შვილის საქციელს, რაზეც მამა ამბობს, რომ ეს არასწორია და თავადაც იბრძოდა აფხაზეთში. ე.წ. გამომძიებელი მას აზუსტებინებს, კონკრეტულად სად იბრძოდა და მისი შვილი "როგორ აძლევს თავს უფლებას" თქვას მსგავსი რამ.

"არ მიფიქრია და არ ვიცოდი, რომ ის ამას გააკეთებდა", — ამბობს მამა.

ალიონა ტანიამ ვიდეო სოციალურ ქსელში 27 მარტს გამოაქვეყნა. ე.წ. საგამოძიებო უწყების წარმომადგენლები ირწმუნებიან, რომ ვიდეოში გაჟღერებულ ფრაზაზე "აღშფოთებული მოქალაქეებისგან" პრეტენზიებს იღებდნენ. მეტიც, მათი თქმით, "ისტორია ბოდიშის მოხდით არ დასრულებულა" — ნახეს ფოტოები, სადაც ახალგაზრდებს, მათ შორის, ალიონა ტანიას ე.წ. პოლიციის ფორმა აცვიათ და ამ საკითხსაც სწავლობენ.

ალიონა ტანია იძებნება Facebook-ზეც. მას 2020 წლის 21 თებერვალს სამუშაო ადგილად აფხაზეთის ე.წ. შინაგან საქმეთა სამინისტრო მიუთითა.

ეს პირველი შემთხვევა არ არის, როცა დე ფაქტო ხელისუფლების წარმომადგენლები ადამიანებს ბოდიშს საჯაროდ ახდევინებენ. ე.წ. მილიციის მიერ გამოქვეყნებულ ვიდეოში ბოდიშს იხდის ოკუპირებული გალის რაიონის მცხოვრები ირაკლი ბებუა, რომელმაც აფხაზური დროშა დაწვა.

ოკუპირებული ცხინვალის ციხიდან გათავისუფლებულმა ხვიჩა მღებრიშვილმა კი განცხადა, რომ ღამურების გატაცების მცდელობა, რომელზეც მას საოკუპაციო რეჟიმი ადანაშაულებდა, სისულელეა და ამის "აღიარება" დაავალეს.