ქუთაისის საერთაშორისო უნივერსიტეტის (KIU) მშენებლობაზე დასაქმებულებმა კუთვნილი ხელფასების გაცემით მოთხოვნით სასწავლო დაწესებულების მშენებლობოს ადგილას საპროტესტო აქცია გამართეს. ადგილობრივი გამოცემა ქუთაისი პოსტის ცნობით, მუშებს ოთხი თვეა ხელფასი არ აუღიათ.

"ამდენის მოთმენა აღარ შეგვიძლია, ვიდრე ხელფასს არ მოგცემენ არ ვაპირებთ სამუშაოს გაგრძელებას", — ამბობს ერთ-ერთი დასაქმებული ქუთაისიპოსტთან.

On.ge გამართულ აქციასთან დაკავშირებით ფონდ ქართუს დაუკავშირდა, სადაც გვითხრეს, რომ აღნიშნული პროტესტი მათთან კავშირში არ არის და რომ დასაქმებულების წინაშე დავალიანება ქვეკონტრაქტორ კომპანიას აქვს.

"ცუდი და შემაშფოთებელი ფაქტია, რა თქმა უნდა. ნეგატიურად ვართ ამაზე ჩვენ განწყობილნი. კომპანიამ თქვა, რომ დროებითი ხარვეზების გამო ვერ მოხერხდა ხელფასების გაცემა და პრობლემის აღმოფხვრის შესახებაც დაჰპირდნენ აქციის მონაწიილეებს", — განაცხადა On.ge-სთან ფონდი ქართუს პროექტების დირექტორმა, ვახტანგ ცაგარელმა.

ქუთაისის საერთაშორისო უნივერსიტეტის მშენებლობა ბიძინა ივანიშვილის საქველმოქმედო ფონდ ქართუს დაფინანსებით მიმდინარეობს.

60 000 სტუდენტზე გათვლილმა საგანმანათლებლო დაწესებულებამ 2020 წლის შემოდგომაზე, სწავლების პირველ წელს 246 სტუდენტი მიიღო.

უნივერსიტეტის საზეიმო გახსნას პრეზიდენტი, სალომე ზურაბიშვილი, პრემიერმინისტრი, გიორგი გახარია, პარლამენტის თავმჯდომარე, არჩილ თალაკვაძე, განათლების მინისტრი, მიხეილ ჩხენკელი და KIU-ს საპატიო პრეზიდენტი, პროფესორი ვოლფგანგ ჰერმანი დაესწრო.

საგანმანათლებლო დაწესებულების პრეზენტაცია 2016 წელს არჩევნებამდე 10 დღით ადრე გაიმართა. ღონისძიებას მაშინ მთავრობის ხელმძღვანელი პირების გარდა, 2016 წელს ქვეყნის ყოფილი პრემიერმინისტრი, ბიძინა ივანიშვილიც ესწრებოდა. მაშინ განაცხადეს, რომ სასწავლო დაწესებულებას სტუდენტთა პირველი ნაკადი 2019 წელს უნდა მიეღო.

ამავე თემაზე: