სუეცის არხში გაჭედილი უზარმაზარი სატვირთო გემი სანაპირო ზოლიდან გაათავისუფლეს. როგორც BBC წერს, ინფორმაციას ამის შესახებ ოფიციალური პირები ავრცელებენ.

არხის ხელმძღვანელები აცხადებენ, რომ 400-მეტრიანი Ever Given-ის კურსი 80 პროცენტით დაკორექტირდა. ამასთან, გემის გადაადგილებისთვის სამუშაოები მოგვიანებით გაგრძელდება.

Ever Given-მა ერთ-ერთი ყველაზე მოთხოვნადი სავაჭრო მარშრუტი თითქმის ერთი კვირის განმავლობაში დაბლოკა. გემის გათავისუფლების შესახებ ინფორმაციამ იმედი გააჩინა, რომ მოძრაობა არხში უახლოეს საათებში აღდგება. არხის ხელმძღვანელები აცხადებენ, რომ მოძრაობა მას შემდეგ დაიწყება, რაც უზარმაზარ გემს მოლოდინის ზონაში გადაიყვანენ.

200 000-ტონიანი Ever Given სუეცის არხში 23 მარტს ძლიერი ქარის და ქვიშის ქარიშხლის გამო გაიჭედა. მისი ნაპირიდან ჩამოხსნა კი ამ დრომდე ვერ ხერხდებოდა, რამაც საცობიც გამოიწვია. არხზე გამსვლელი გემების რაოდენობა კი ყოველდღიურად იზრდებოდა.

არხი, რომელიც აფრიკას ახლო აღმოსავლეთისგან და აზიისგან ჰყოფს, ერთ-ერთი ყველაზე დატვირთული სავაჭრო მარშრუტია, სადაც მსოფლიო საქონლის საერთო მოცულობის 12 პროცენტი გადის. ამასთან, ის ყველაზე მოკლე გზაა აზიისა და ევროპის დასაკავშირებლად. ალტერნატიული მარშრუტი, რომელიც აფრიკის სამხრეთით, კეთილი იმედის კონცხის გასწვრივ გადის, მოგზაურობას ორი კვირით ახანგრძლივებს.