დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის, ამირან გამყრელიძის განცხადებით, ქვეყნის სირცხვილი იქნება, თუ ვაქცინების ის მცირე დოზებიც კი ვერ ავითვისეთ, რაც გვაქვს.

"ჩემი აზრით, ამ შემთხვევაში და ზოგადად, ის რომ საქართველომ ეს ძალიან მცირე დოზები ვაქცინებისა ვერ ავითვისოთ, ეს იქნება სირცხვილი ქვეყნის და პირადად ჩვენი სირცხვილი, ექიმების.

იმიტომ, რომ როცა ჩვენ ვლაპარაკობთ, რომ აცრებზე გადის პანდემიის დასრულების გზა, აცრაზე უკეთესი, ინფექციურ დაავადებათა პრევენციისთვის და დღეს, უკვე არაინფექციური დაავადების, მათ შორის კიბოს პრევენციისთვის, კაცობრიობას ჯერ არ მოუგონია. გამოდის, რომ ქართველები მაშინ ცოტა, მაპატიეთ და მეტი განათლება და მეტი ცოდნა გვჭირდება", — განაცხადა ამირან გამყრელიძემ.

მისი თქმით, თუ იმ ჯგუფებში, ვისთვისაც ახლა ხელმისაწვდომია ვაქცინა, აცრის მსურველთა რაოდენობა არ გაიზარდა, კიდევ გაფართოვდება არეალი.

"იცით, რომ პირველ რიგში იცრებოდნენ სამედიცინო პერსონალი, იგივე AstraZeneca-თი. რადგან დაბალი იყო აქტიურობა, ჩვენ დავაჩქარეთ რეგისტრაცია უკვე და გავხსენით 65 წელს ზემოთ. დავაკვირდებით ერთი კვირის, 10 დღის განმავლობაში. თუ ვნახეთ, რომ კვლავ დაბალია აქტიურობა, რა თქმა უნდა, მერე მეორე ნაბიჯზე გადავალთ, ანუ, გავაფართოვებთ აცრის არეალს", — განაცხადა გამყრელიძემ.

შეგახსენებთ, რომ თავდაპირველად ვაქცინა მხოლოდ სამედიცინო პერსონალისთვის იყო ხელმისაწვდომი. გეგმის მიხედვით, მედპერსონალის შემდეგ, იგი უნდა გავრცელებულიყო ხანგრძლივი მოვლის დაწესებულებების ბენეფიციარებისა და 75 წელზე მეტი ასაკის ადამიანებისთვის. თუმცა, 22 მარტს ჯანდაცვის მინისტრმა, ეკატერინე ტიკარაძემ განაცხადა, რომ ვაქცინაციის პროცესში 65 წელს ზევით მოქალაქეებიც ჩაერთვებიან.

საქართველოში პირველად AstraZeneca-ს ვაქცინის 43 200 დოზა შემოვიდა, დაახლოებით ორი კვირის შემდეგ კი Pfizer-ის ვაქცინის 29 250 დოზა.

დაავადებათა კონტროლისა ეროვნული ცენტრის ინფორმაციით, 26 მარტის 14:00 საათის მონაცემებით 4 152 ადამიანი აიცრა, სპეციალურად ვაქცინაციისთვის შექმნილ პორტალზე, booking.moh.gov.ge-ზე კი 11 273 ადამიანია დარეგისტრირებული.

გაიგეთ მეტი: