ბროწეულას ქუჩის 41-ში, მრავალსართულიან კორპუსში მცხოვრები დევნილები შიშობენ, რომ ვაშლიჯვრის ფერდობზე განვითარებული მეწყერი შეიძლება მათთვის საშიში იყოს. როგორც ისინი ფორმულას ეთერში ამბობენ, მათთან მიდიან ხელისუფლების წარმომადგენლები, თუმცა კომპეტენტური აზრი ვერ მოისმინეს.

"თუ გვემუქრება რამე, დროულად მოახდინონ ევაკუაცია. ჩვენ დიდი არაფერი მოგვითხოვია, ელემენტარულად, ადამიანურად. ჩვეულებრივი ენით აგვიხსნას. ამ ზუსტ პასუხს არავინ გვეუბნება", — ამბობს ბროწეულას დასახლების მკვიდრი.

ამასთან, მათ სეისმოლოგი თეა გოდოლაძის მისვლა ითხოვეს, რათა კითხვებზე პასუხი მისგან მიიღონ. თეა გოდოლაძემ პოლიტიკის ფორმულაში აღნიშნა, რომ მეწყერი მოსახლეობისთვის საშიშია და ამის შესახებ მას გერმანელმა ექსპერტებმაც უთხრეს. მისივე თქმით, თუ მეწყრის დიდი მასა დაეშვა, ევაკუაცია ვერ მოესწრება.

"ეს იმდენად რთული საკითხია, რომ ეს უსაფრთხოების საბჭომ უნდა განიხილოს. რატომ იღებს მუნიციპალიტეტი ასეთი ტიპის პასუხისმგებლობას, წარმოუდგენელია. როცა მეუბნებიან, რომ გაამაგრებენ, არ მჯერა. ნამდვილად არ მჯერა. ანა-ბანაა ამ დარგის, რომ ნახევარ მილიონ კუბს ანკერებით ვერ გაამაგრებენ. არ უთქვამთ ეს გერმანელ სპეციალისტებს... [გერმანელმა ექსპერტებმა] მე მითხრეს, რომ მოსახლეობას ვუთხრა, რომ ფრთხილად იყვნენ. ეს მითხრეს, რომ ეს გავაჟღერო", — აღნიშნავს გოდოლაძე.

მას შემდეგ, რაც ცნობილი გახდა, რომ ვაშლიჯვარში მეწყერული ფერდობია, გაჩნდა კითხვა, უნდა მოხდეს თუ არა მოსახლეობის ევაკუაცია. თბილისის მერის მოადგილემ, ირაკლი ბენდელიანმა 25 მარტსაც განაცხადა, რომ ევაკუაციის საჭიროება ამ ეტაპზე არ არსებობს.