სოფელ ქვახვრელთან უხვი ნალექის გამო წარმოქმნილი კუნძულიდან წვრილფეხა პირუტყვის გამოყვანა დაიწყეს. საგანგებო სიტუაციების მართვის სამსახურში აცხადებენ, რომ კუნძულთან დასაკავშირებლად საბაგირო გზა მოეწყო.

როგორც უწყებაში ამბობენ, კუნძულზე მყოფი მწყემსების ნაწილი გუშინ, 24 მარტს გამოიყვანეს, ნაწილი კი თავისი სურვილით პირუტყვთან დარჩა.

მდინარე მტკვარი 24 მარტს ადიდდა, რის გამოც ხელოვნური კუნძული წარმოიქმნა. კუნძულზე ექვსი მწყემსი და დიდი ოდენობის წვრილფეხა პირუტყვი და საქონელი იყო დარჩენილი. საგანგებო სიტუაციების მართვის სამსახურში ამბობენ, რომ მდინარის დინების სიჩქარის და წყლის დონის მომატების გამო, საქონლის გამოყვანა ვერ ხერხდებოდა. ორმა მწყემსმა გადაწყვიტა კუნძულზე დარჩენა. საგანგებო სიტუაციების მართვის სამსახურმა კი მათთვის ღამის გასათევი მოაწყო.