დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, 65 წელს ზემოთ ადამიანებს შეუძლიათ გეოგრაფიული მდებარეობის შესაბამისად, ვაქცინაციისთვის გამოყოფილ 24 კლინიკაში მივიდნენ, სადაც პორტალზე დარეგისტრირებაში დაეხმარებიან.

"თქვენი საშუალებით, მინდა მივმართო მოსახლეობას, განსაკუთრებით ხანდაზმულებს, 65 წელს ზემოთ ადამიანებს, რომ მარტო პორტალით ნუ შემოიფარგლებიან. მათ ახალგაზრდა ოჯახის წევრებს მინდა მივმართო და ვთხოვო, მიეხმარონ იმ ადამიანებს, ვისაც ინტერნეტის ჩვევები ნაკლები აქვთ, დარეგისტრირებაში.

რეგისტრაცია იქნება 2-2-კვირიანი დაჯავშნა იქნება. მერე შეიძლება ეს გახანგრძლივდეს, იმისდა მიხედვით, თუ რა მარაგი გვექნება ხოლმე ვაქცინების. ასევე, ამ ადამიანებს შეუძლიათ, ამ 24 კლინიკაში, გეოგრაფიული მდებარეობის მიხედვით მივიდნენ, იქ არის ვირტუალური კაბინეტები, სადაც მიეხმარებიან ადგილზე, ვისაც არ შეუძლია წინასწარ დაჯავშნა, იქ დააჯავშნიებენ და შესაბამისად, ცოცხალი რიგიც იქნება. იმიტომ, რომ ამ კატეგორიას ადამიანების, მაქსიმალურად უნდა შევუწყოთ ხელი", — თქვა მან.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ჯანდაცვის მინისტრის მოადგილის, თამარ გაბუნიას განცხადებით, დღეს საღამოდან პორტალზე Pfizer-ის ვაქცინით აცრაზე რეგისტრაცია უკვე შესაძლებელი იქნება. ამიერიდან მოქალაქეებს კორონავირუსის საწინააღმდეგო აცრის ჩატარება ორი, AstraZeneca-სა და Pfizer-ს შორის არჩევანის გაკეთებით შეეძლებათ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.