ჯანდაცვის მინისტრის მოადგილის, თამარ გაბუნიას განმარტებით, Pfizer-ის ერთი ფლაკონით 6 ადამიანის აცრაა შესაძლებელი, ხოლო AstraZeneca-თი — 10. მისი თქმით, იმ შემთხვევაში თუ ვაქცინაციის რიგში ადამიანების ამდენივე რაოდენობა არ იქნება, ფლაკონები არ გაიხსნება. ამის შესახებ მან ჯანდაცვის სამინისტროში გამართულ ბრიფინგზე ისაუბრა.

"Pfizer-ს სჭირდება სპეციალური საინექციო შპრიცი, რომელიც ქვეყანამ შეიძინა მანამდე, უკვე დარიგებულია 6-ვე დაწესებულებაში, პერსონალი მომზადებულია. სხვა განსხვავება ადმინისტრირების წესში, გარდა იმისა, რომ ტემპერატურული რეჟიმია განსხვავებულია, არ არსებობს. თუმცა სამედიცინო დაწესებულებებში Pfizer-ის ვაქცინა ინახება 2-დან 8 გრდაუსამდე ტემპერატურის პირობებში და ამიტომ, დოზების გატანა მოხდება მკაცრი მონიტორინგის ქვეშ.

ვიცით, რომ 6 ადამიანის აცრა არის შესაძლებელი ერთი ფლაკონით, როცა AstraZeneca-თი შესაძლებელია 10 ადამიანის აცრა ერთი ფლაკონით. ამდენად, 6 ადამიანი თუ არ იქნა რიგში, ისე Pfizer-ის ფლაკონი არ გაიხსნება, იგივე შეეხება AstraZeneca-საც. ამას გააკონკტროლებენ ძალიან მკაცრად", — თქვა მან.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ჯანდაცვის მინისტრის მოადგილის, თამარ გაბუნიას განცხადებით, დღეს საღამოდან პორტალზე Pfizer-ის ვაქცინით აცრაზე რეგისტრაცია უკვე შესაძლებელი იქნება. ამიერიდან მოქალაქეებს კორონავირუსის საწინააღმდეგო აცრის ჩატარება ორი, AstraZeneca-სა და Pfizer-ს შორის არჩევანის გაკეთებით შეეძლებათ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.