28 მარტს ვაშლიჯვარში კორპუსების მშენებლობაზე მორატორიუმის გამოცხადების მოწოდებით აქცია გაიმართება.

აქციის ორგანიზატორები ასევე მოთხოვენ:

  • ვაშლიჯვარში მორატორიუმის გამოცხადება ყველა ტიპის მშენებლობაზე, განხილვის პროცესში არსებულ სამშენებლო მოთხოვნებზე დასკვნების გაცემის შეჩერება;
  • დამოუკიდებელ ქართველ და საერთაშორისო ექსპერტთა ჯგუფის შექმნა, რომელთა ვინაობაც გასაჯაროვდება და რომელიც გამოიკვლევს ლისის ქედს სრულად, მის რისკებს;
  • ლისის დაზიანებულ ფერდზე სამონიტორინგო სისტემის დამონტაჟბა, რომელიც 24-საათიან რეჟიმში დააკვირდება ფერდს და საჯარო წესით საზოგადოებას მიაწოდებს ინფორმაციას;
  • მაჭავარიანის ქუჩიდან მიმავალი ესტაკადის მშენებლობის შეწყვეტა და ქუჩის არგახსნა იქამდე, სანამ ექსპერტიზის პასუხი, დასკვნა არ იქნება, რომელიც მათ უსაფრთხოებას დაადასტურებს;
  • ვაშლიჯვრის უბნის შესწავლა და გეოლოგიური ანალიზის გასაჯაროება.

ვაშლიჯვრის მოსახლეობის მიერ აღნიშნული მოთხოვნებით შექმნილია პეტიცია.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.

ექსპერტები ამბობენ, რომ მეწყრის სისტემა დაძრულია და დღეში 5სმ-ით მოძრაობს. მათი თქმით, საფრთხე რეალურია და მიწის მასა, შესაძლოა, ჩამოვიდეს.

მერის მოადგილის, ირაკლი ბენდელიანის განცხადებით, ნალექიანი ამინდების შემთხვევაში, მაჭავარიანის ქუჩასა და მიმდებარე ტერიტორიაზე სრულად გაჩერდება სამშენებლო სამუშაოები.

გაიგეთ მეტი: