ჯანდაცვის მინისტრის მოადგილის, თამარ გაბუნიას განცხადებით, საქართველო Pfizer-ის ვაქცინას 25 მარტს მიიღებს. ჯანდაცვის სამინისტროს ოფიციალურ ფეისბუქგვერდზე წერია, რომ საქართველოში ხვალ 29 250 დოზა Pfizer-ის ვაქცინა შემოვა.

"ხვალ უკვე იქნება Pfizer-ის ვაქცინაც, რაც დაემატება ვაქცინაციის პროგრამას, ამდენად, ის დაწესებულებებიც, რომლებიც ჩართულები იყვნენ AstraZeneca-ს ვაქცინაიის პროცესში, მაგრამ თავდაპირველად, მათი შეფასება მოხდა Pfizer-ის ვაქცინაციისთვის, გადაერთვებიან და გააგრძელებენ Pfizer-ით ვაქცინაციის პროგრამას. ასეთი დაწესებულება თბილისში არის 4, აჭარაში 1 — ბათუმის რესპუბლიკური საავადმყოფო, ხოლო 2 არის ქუთაისში, მათ შორის, ერთი ცხაკაიას სახელობის ინტერვენციული მედიცინის ცენტრი.

თბილისში ის დაწესებულებები, რომლებიც Pfizer-ის ვაქცინით გააგრძელებენ პროცესს არის: თბილისის რესპუბლიკური საავადმყოფო, ბოკერიას სახელობის კლინიკა, ქავთარაძეზე კავკასიის მედიცინის ცენტრი და კიდევ ერთი დაწესებულებაა, ამტელ ჰოსპიტალი", — თქვა მან.

თავდაპირველად, ჯანდაცვის მინისტრმა, ეკატერინე ტიკარაძემ თქვა, რომ საქართველო Pfizer-ის ვაქცინას 24 მარტს მიიღებდა. უცნობია, რატომ გადაიწია შემოტანის თარიღმა. On.ge ცდილობს ჯანდაცვის სამინისტროსთან დაკავშირებას, მაგრამ უწყებაში ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.