თბილისის მერის მოადგილე, ირაკლი ხმალაძე აცხადებს, რომ მერიის თანამშრომლის დაკავება პირველი შემთხვევა არაა, თუმცა იმედი აქვს უკანასკნელი იქნება.

"პირველ რიგში, ერთი რაღაცის თქმა მინდა, რომ ყველაფერთან ერთად, რასაც მუნიციპალიტეტი აკეთებს ყოველდღიურად, მუნიციპალური საქმიანობა მაქვს მხედველობაში, პარალელურად ჩვენ ვმუშაობთ საგამოძიებო ორგანოებთან კორუფციასთან ბრძოლის მიმართულებით და კორუფციის პრევენციის მიმართულებით. ეს არ არის პირველი შემთხვევა, იმედია უკანასკნელი იქნება, მაგრამ ამ ყველაფრის მიუხედავად, ჩვენ ვართ კანონის სადარაჯოზე და მინდა მთელი ჩვენი სისტემის თანამშრომლებს მივმართო, რომ თავი შეიკავონ ასეთი ქმედებებისგან, თუ ვინმეს ასეთი განზრახვა აქვს, ვინაიდან არცერთი ასეთი უკანონო ქმედება რეაგირების გარეშე არ დარჩება", — განაცხადა მერის მოადგილემ.

სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ქრთამის აღების ბრალდებით, თბილისის მერიის, მუნიციპალური ინსპექციის ისანი-სამგორის რაიონული განყოფილების უფროსი სპეციალისტი დააკავეს.