საპარლამენტო უმრავლესობის ერთ-ერთი ლიდერი, ირაკლი ზარქუა აცხადებს, რომ მიუხედავად იმისა, რომ არ მიეკუთვნება რისკჯგუფს, მზადაა გაიკეთოს ვაქცინა თუ ამის საჭიროება და ვაქცინის საკმარისი რაოდენობა იქნება. ასე გამოეხმაურა იგი, ჯანდაცვის მინისტრის, ეკატერინე ტიკარაძის პირდაპირ ეთერში აცრას.

"ეს არის მნიშვნელოვანი აქტი, რომ მოცვა გავაძლიეროთ. მიუხედავად იმ სავალალო შედეგისა, ტრაგედიისა, რაც მოხდა [...] ვაქცინაცია არის ერთადერთი საშუალება, პირბადესთან ერთად, რომ ჩვენ გადავრჩეთ, როგორც ერი. ასე რომ, კიდევ ერთხელ მადლობა ამ აქტისთვის ქალბატონ მინისტრს. თუ გახდება საჭირო, მე არ მივეკუთვნები რისკჯგუფს, მაგრამ, თუ იქნება მზადყოფნა და ვაქცინების რაოდენობა, მზად ვარ ჩავერთო", — განაცხადა ირაკლი ზარქუამ.

ჯანდაცვის მინისტრმა, ეკატერინე ტიკარაძემ დღეს, საჩხერის კლინიკაში, პირდაპირ ეთერში AstraZeneca-ს ვაქცინა გაიკეთა.

მინისტრი საჯაროდ AstraZeneca-ს ვაქცინის გაკეთებას მას შემდეგ დათანხმდა, რაც ამ ვაქცინის მიმართ ნდობა დაეცა. როგორც მან ერთ-ერთი ინტერვიუს დროს აღნიშნა, დაგეგმილი იყო, რომ ის ჩინური ვაქცინით უნდა აცრილიყო. რაც შეეხება AstraZeneca-ს, ტიკარაძე ამბობდა, რომ არ სურდა უფლებამოსილებით ესარგებლა და ვაქცინა სხვას სჭირდებოდა.

მას შემდეგ, რაც ახალციხელი ექთანი გარდაიცვალა, მედიკოსები ვაქცინაციაზე უარს ამბობენ. ვრცელდება ინფორმაცია, რომ ის ექიმებიც კი, ვისაც დაჯავშნილი ჰქონდა ვაქცინის რიგი, უარს ამბობენ AstraZeneca-თი აცრაზე. მიზეზად კი იმას ასახელებენ, რომ მათი კოლეგა ვაქცინაციის შემდეგ, სავარაუდოდ, ანაფილაქსიური შოკით გარდაიცვალა.

ევროკავშირის სამედიცინო რეგულატორის დასკვნით, Oxford-AstraZeneca-ს ვაქცინის გამოყენება უსაფრთხო და ეფექტიანია. მისგან მიღებული სარგებელი კი უფრო მეტია, ვიდრე რისკი. ევროკავშირის სამედიცინო რეგულატორმა ეს დასკვნა მას შემდეგ გამოაქვეყნა, რაც ევროკავშირის 13-მა ქვეყანამ ვაქცინის გამოყენება თრომბოემბოლიასთან დაკავშირებული შიშების გამო შეაჩერა.

რამდენიმე დღის წინ, ჯანდაცვის მსოფლიო ორგანიზაციამაც მოუწოდა ქვეყნებს, არ შეეწყვიტათ AstraZeneca-თი ვაქცინაცია და დაადასტურა, რომ ის სიცოცხლისთვის საშიშ გართულებებს არ იწვევს. AstraZeneca-ს განცხადებაში კი, 17 მილიონი ადამიანის მონაცემებზე დაყრდნობით, ნათქვამია, რომ არ დასტურდება ფილტვის თრომბოემბოლიის, ღრმა ვენის თრომბოზისა თუ თრომბოციტოფენიის კავშირი ამ ვაქცინასთან, არც ერთ ასაკობრივ და სქესობრივ ჯგუფში.

გაიგეთ მეტი: