ჯანდაცვის მინისტრის, ეკატერინე ტიკარაძის განცხადებით, მესამე ტალღა მოსალოდნელია და გამორიცხული არ არის შეზღუდვების გამკაცრება.

"მესამე ტალღა მოსალოდნელი არის და ყველა ის ნიშნული, რომელიც დღესდღეობით არის მომატებული, ჩვენ გვაძლევს იმის ეჭვს და საფუძველს, რომ მნიშნველოვნად უნდა გამკაცრდეს ყველა ის ღონისძიება, რომელიც დღესდღეობით მოსახლოებისთვის არის ცნობილი. ამაში მე ვგულისხმობ, პირველ რიგში, პირბადეების ტარებას, სოციალურ დისტანცირებას და პირად ჰიგიენას.

მე არ გამოვრიცხავ, რომ შეზღუდვები ისევ დაწესდეს, ვინაიდან, შეზღუდვები ეს არის ეფექტური გზა. თუმცა, კიდევ ერთხელ მივუთითებ, მე დარწმუნებული ვარ და ღრმად მწამს იმის, რომ ჩვენს მოსახლეობას ეყოფა გონიერება, საზოგადოებრივი პასუხისმგებლობა, ასევე, ბიზნეს ეყოფა პასუხისმგებლობა დაიცავენ ყველა იმ ღონისძიებას, რომელსაც შრომითი ინსპექცია, დაავადებათა კონტროლის ცენტრი და ეპიდემიოლოგები მიუთითებენ, რომ ბიზნესის მინიმალური შეზღუდვით შევძლიოთ და დავძლიოთ მესამე ტალღა", — განაცხადა მან.

დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ბოლო დღეებში საქართველოში ეპიდსიტუაციის გაუარესების ტენდენცია შეინიშნება. მანვე აღნიშნა, რომ ახალი შტამის 50 შემთხვევა დაფიქსირდა. ტიკარაძის თქმით, 50 ახალი შემთხვევა მესამე ტალღის დაწყებას არ ნიშნავს, თუმცა ის მოსალოდნელია.

"გაჩნდა ბოლო დღეებში გარკვეული ტენდენცია ეპიდსიტუაციის გაუარესებისკენ. მე არ ვიტყვი, რომ ნახტომისებური ზრდა გვაქვს, მაგრამ დღეს 21 000 ტესტზე არის 528 შემთხვევა, რამაც დადებითობის მაჩვენებელი აიყვანა 2,53%-ზე. თუმცა 7 და 14-დღიან დადებითობის მაჩვენებელში ჯერჯერობით გვაქვს სტაბილურობა", — განაცხადა გამყრელიძემ.

23 მარტის მონაცემებით, საქართველოში კორონავირუსის 528 ახალი შემთხვევა დადასტურდა, გამოჯანმრთელდა 299, ხოლო გარდაიცვალა 4 ადამიანი.