თბილისის მერის მოადგილის, ირაკლი ბენდელიანის განცხადებით, მეწყერული პროცესების შესახებ ჩატარებული კვლევის პირველადი შედეგები, დაახლოებით, კვირის ბოლოს ექნებათ. ამაზე მან თბილისის მერიაში მიმდინარე ბრიფინგზე ისაუბრა.

"მიუხედავად იმისა, რომ პროცესების გააქტიურების დღიდან, უწყვეტ რეჟიმში მიმდინარეობდა მონიტორინგი, სამუშაო ჯგუფის შეხვედრაზე მივიღეთ დამატებითი გადაწყვეტილება, რომ მოხდეს შესაბამისი, სპეციალური სისტემების მონტაჟი, რაც კიდევ უფრო მეტი მონიტორინგის საშუალებას მოგვცემს. ადგილობრივ მოსახლეობასთან მუდმივ რეჟიმში მიმდინარეობს კომუნიკაცია. ის შეზღუდვები, რაც მიმდებარე არელაზე, კვლავ რჩება ძალაში და მოვუწოდებ ყველას, დაიცვან ეს შეზღუდვები", — თქვა მან.

ბენდელიანის თქმით, პროცესეის შესწავლაში უკვე ჩაერთნენ გერმანელი სპეციალისტებიც. ერთ-ერთი მათგანი იყო ბრიფინგზე და თქვა, რომ პროცესი კომპლექსურია, შესაბამისად, მის გადასაჭრელად ერთი კონკრეტული გზა არ არსებობს. მან, ასევე, აღნიშნა, რომ გზის გადაკეტვა და ის შემზღუდავი სამუშაოები, რაც დაწესდა, მართებული ნაბიჯი იყო.

"ეს არის, სავარაუდოდ, ინიცირების ფაზა, შესაძლო მასშტაბური მეწყერის. ჩვენ ახლა უნდა გნავახორციელოთ პირველადი ზომები, რაც გულისხმობს, გასამაგრებელი სამუშაოები, დრენაჟები და მონიტორინგი. ჩვენ უნდა ვიყოთ ყურადღება, დავეყრდნოთ, დაველოდოთ კვლევებს და ამის შემდეგ გადავდგათ შესაბამისი ნაბიჯები", — თქვა მან.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.

გაიგეთ მეტი: