NDI-ს კვლევის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.

იმათგან, ვინც არ თქვა რომ აიცრებოდა (65 პროცენტი), 48 პროცენტი ამბობს, რომ ვაქცინაციის პროცესს არ ენდობა. 20 პროცენტი მიიჩნევს, რომ ვაქცინაციის გარეშეც გავუმკლავდებით პანდემიას. ჯანმრთელობასთან დაკავშირებული მიზეზების გამო უარს ამბობს 10 პროცენტი. ამასთან, 6 პროცენტს ჰგონია, რომ ვაქცინაციას სხვა მიზნები აქვს, ხოლო 5 პროცენტი ზოგადად მისი წინააღმდეგია.

ფოტო: NDI

კვლევის საველე სამუშაოები 2021 წლის 17-24 თებერვალს ჩატარდა. სატელეფონო ინტერვიუს გზით ქვეყნის მასშტაბით 2 024 ადამიანი გამოიკითხა (ოკუპირებული ტერიტორიების გამოკლებით). რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე.

კვლევის საშუალო ცდომილების ზღვარი +/- 1,4%-ა. NDI-ში განმარტავენ, რომ ახალი მონაცემების კვლევის წინა ტალღებთან შედარებისას გასათვალისწინებელია, რომ ინტერვიუს მეთოდის ცვლილება შესაძლოა ცდომილებაზე აისახოს.