ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის განცხადებით, წარმოუდგენელია მედპერსონალის მხრიდან ვაქცინაციაზე უარის თქმა. ის კოლეგებისთვის კიდევ ერთხელ განმარტავს, რომ ნებისმიერ ვაქცინას აქვს გვერდითი მოვლენა და მათ აცრისკენ მოუწოდებს.

"თუ არაფერს არ დავიჯერებთ და არაფერზე არ გვექნება, მაშინ მედიკოსებიც არ უნდა ვიყოთ მემგონი. არ შეიძლება ასეთი მიდგომა ვაქცინაციის მიმართ, იმიტომ, რომ ყველა მედიკოსმა, ალბათ, იცის, რომ ახლა ჩვენი გადარჩენის ერთადერთი საშუალება არის ვაქცინაცია, ამ ეტაპზე, ჯერჯერობით მედიკამენტიც არ არსებობს ამის", — განაცხადა მან რუსთავი 2-ის ეთერში.

ენდელაძე აცხადებს, რომ სამწუხაროა, რაც მოხდა, თუმცა ვაქცინის სანდოობა კითხვის ნიშნის ქვეშ არ დგას და ამას ადასტურებენ საერთაშორისო ორგანიზაციებიც. ასევე, ის განმარტავს, რომ თავადაც ალერგიულია, თუმცა ვაქცინაზე გვერდითი რეაქცია არ ჰქონია.

"წარმოუდგენელია [ვაქცინაზე უარის თქმა]. მითუმეტეს, მედპერსონალისაგან. ახლა რომ იყოს მასიური იმუნიზაცია და არამედპერსონალი იტარებდეს ვაქცინაციას, კიდევ რაღაცნაირად გავიგებდი ამას, მაგრამ მედპერსონალისაგან ეს ნამვილად არ შეიძლება, ასეთი რაღაც. ისინი ხედავენ, მაგალითად ჩვენ პირველივე დღეს ავიცერით ხო.

თუკი რაიმე რისკფაქტორი შეიძლებოდა ყოფილიყო, მე უნდა ვყოფილიყავი, იმიტომ, რომ ვარ ალერგიული, მაქვს ასაკი და ბევრი რამ ისეთი. მე არანაირი [გართულება არ მქონია], უბრალოდ, ცოტა მგრძნობელობა მკლავზე, სადაც ამცრეს და პირველ დღეს, სავარაუდოდ, მქონდა ტემპერატურა", — ამბობს ის.

მას შემდეგ, რაც ახალციხელი ექთანი გარდაიცვალა, მედიკოსები ვაქცინაციაზე უარს ამბობენ. ვრცელდება ინფორმაცია, რომ ის ექიმებიც კი, ვისაც დაჯავშნილი ჰქონდა ვაქცინის რიგი, უარს ამბობენ AstraZeneca-თი აცრაზე. მიზეზად კი იმას ასახელებენ, რომ მათი კოლეგა ვაქცინაციის შემდეგ, სავარაუდოდ, ანაფილაქსიური შოკით გარდაიცვალა.

ევროკავშირის სამედიცინო რეგულატორის დასკვნით, Oxford-AstraZeneca-ს ვაქცინის გამოყენება უსაფრთხო და ეფექტიანია. მისგან მიღებული სარგებელი კი უფრო მეტია, ვიდრე რისკი. ევროკავშირის სამედიცინო რეგულატორმა ეს დასკვნა მას შემდეგ გამოაქვეყნა, რაც ევროკავშირის 13-მა ქვეყანამ ვაქცინის გამოყენება თრომბოემბოლიასთან დაკავშირებული შიშების გამო შეაჩერა.

რამდენიმე დღის წინ, ჯანდაცვის მსოფლიო ორგანიზაციამაც მოუწოდა ქვეყნებს, არ შეეწყვიტათ AstraZeneca-თი ვაქცინაცია და დაადასტურა, რომ ის სიცოცხლისთვის საშიშ გართულებებს არ იწვევს. AstraZeneca-ს განცხადებაში კი, 17 მილიონი ადამიანის მონაცემებზე დაყრნობით, ნათქვამია, რომ არ დასტურდება ფილტვის თრომბოემბოლიის, ღრმა ვენის თრომბოზისა თუ თრომბოციტოფენიის კავშირი ამ ვაქცინასთან, არც ერთ ასაკობრივ და სქესობრივ ჯგუფში.

ამავე თემაზე:

• რა გავიგეთ ახალციხეში მომხდარ ამბავზე
• შესაძლოა, დაკავშირებულია ვაქცინასთან, დაწყებულია კვლევა — გაბუნია ახალციხელ ექთანზე
• არ ვიცით ეს იყო ალერგიული თუ სხვა ტიპის რეაქცია, უფრო ჰგავდა ანაფილაქსიურ რეაქციას — გამყრელიძე ახალციხეში აცრილ ექთანზე
• ანაფილაქსიური შოკი არის აბსოლუტურად ყველა სახის ვაქცინის შესაძლო, იშვიათი გვერდითი ეფექტი — ზურაბ გურული