სახალხო დამცველის განცხადებით, ანა დოლიძის შესაძლო ფარულ ჩაწერაზე გამოძიება უნდა დაიწყოს. ომბუდსმენი გმობს სახელმწიფოს მხრიდან პირადი ცხოვრების უკანონო ხელყოფის პრაქტიკას, სოლიდარობას უცხადებს ყველა მსხვერპლს და სახელმწიფოს დამაჯერებელი ნაბიჯების გადადგმისკენ მოუწოდებს.

"მიუხედავად იმისა, რომ საუბარია სავარაუდო შემთხვევაზე, მნიშვნელოვანია, სახელმწიფოს დროული და ეფექტიანი რეაგირება, მათ შორის გამოძიების დაუყოვნებლივ დაწყება", — წერია განცხადებაში.

ამავდროულად ლომჯარია აღნიშნავს, რომ საქართველოში პირადი ცხოვრების ამსახველი უკანონო ფარული ჩანაწერების გამოქვეყნების, თუ გამოქვეყნების მუქარის შემთხვევებს ძირითადად, ქალი პოლიტიკოსების მიმართ აქვს ადგილი და საზოგადოებრივ და პოლიტიკურ პროცესებში ჩართული ქალების წინააღმდეგ პოლიტიკური ბრძოლის, მათი გაჩუმების, ჩაგვრის და ძალადობის სისტემურ იარაღად გამოიყენება.

ანა დოლიძე მოითხოვს, რომ ივანე გულაშვილის ინტერვიუს საფუძველზე, მასზე შესაძლო მიყურადებისა და თვალთვალის საქმეზე გამოძიება დაიწყოს. მისი თქმით, ეს საერთაშორისო სკანდალს გამოიწვევს და მმართველ გუნდს მაქსიმალურად მოეთხოვება პასუხი.

საუბარია ინტერვიუზე, რომელშიც, სავარაუდოდ, სუს-ის ყოფილი თანამშრომელი ამბობს, რომ ანა დოლიძის პირადი ცხოვრების ამსახველი კადრები ჩაწერეს. მისივე თქმით, ის დავალებებს მხოლოდ შს მინისტრის მოადგილისგან, კახაბერ საბანაძისგან იღებდა.მთავარი არხის განცხადებით, ინტერვიუ 2019 წელს არის ჩაწერილი და რესპონდენტი უკვე დაკავებულია. მათი თქმით, ინტერვიუ ახლა, მას შემდეგ გასაჯაროვდა, რაც TV პირველმა შს მინისტრის მოადგილის, კახაბერ საბანაძის ფარული ჩანაწერები გაასაჯაროვა. ამ სიუჟეტშიც იგივე პირი, ივანე გულაშვილი ფიგურირებდა.

"ამ ჩვენებაში მოცემულია უსერიოზულესი ბრალდება საჯარო, ხელისუფლების კრიტიკოსი, აქტიური პოლიტიკოსის პირად ცხოვრებაში ჩარევასთან დაკავშირებით. გარანტიას ვაძლევ ქართულ ოცნებას, რომ ეს იქნება უსერიოზულესი პოლიტიკური სკანდალი გლობალური მასშტაბის, — განაცხადა დოლიძემ.

მთავარ არხთან საუბრისას მანვე აღნიშნა, რომ ინტერვიუში გულაშვილი თვალთვალის დაწყების თარიღად 2014 წელს ასახელებს, ამ დროს კი ის საქართველოში არ იმყოფებოდა. თუმცა, დოლიძე ამბობს იმასაც, რომ გულაშვილი აღწერს იმ ნივთებს, რომლებიც სახლში მართლა აქვს, ამიტომ ვარაუდობს, რომ საუბარი არა 2014, არამედ 2015 წელზეა.

დოლიძის განცხადებით, ამ ინტერვიუში ბევრი კითხვა არსებობს და აუცილებელია, რომ ისინი გამოძიებელი იყოს, თუმცა აღნიშნავს, რომ პროკურატურის იმედი არ აქვს.

აღნიშნულთან დაკავშირებით On.ge სახელმწიფო უსაფრთხოების სამსახურს დაუკავშირდა, თუმცა უწყებაში თქვეს, რომ კომენტარს არ აკეთებენ. რაც შეეხება შსს-ს, მათ პასუხს მიღებისთანავე შემოგთავაზებთ.