ჯანდაცვის მინისტრის, ეკატერინე ტიკარაძის განცხადებით, გამომდინარე იქედან, რომ პირბადეების ტარება მინიმუმამდეა დასული, ხოლო სოციალურ დისტანციას მოქალაქეები აღარ იცავენ, არ გამორიცხავს, რომ მალე ქვეყანაში კორონავირუსის მესამე ტალღა დაიწყოს. ამის შესახებ მან რუსთავი 2-ის ეთერში ისაუბრა.

"ამას მე არ უარვყოფ, ამის მოლოდინი ჩვენ ყოველთვის გვქონდა და ნებისმიერი გახსნის პირობებში ყოველთვის ვაანონსებდით, რომ მნიშვნელოვანია მაქსიმალური სიფრთხილე, რათა ხანგრძლივად იყოს გახსნა შენარჩუნებული. სამწუხაროდ, ჩვენ ვაკვირდებით, რომ არანაირი სოციალური დისტანცია არ გაგვაჩნია. ძალიან მოკლე დროში დაგვავიწყდა ჩვენ ის რთულად გამოვლილი მეორე ტალღა, რომელიც შემოდგომაზე გვქონდა.

ასევე, მინიმუმამდე არის დასული პირბადეების ტარება, რაც პირდაპირპროპორციულად აისახება, რა თქმა უნდა, ინფექციის გავრცელებაზე. დღეს ინფექციის გავრცელების კოეფიციენტი უკვე ერთს აღემატება, რაც თავისთავად მიუთითებს იმაზე, რომ შეიძლება ძალიან მალე ჩვენ აღმოვჩნდეთ აღმავალ ფაზაში, რომელიც შეიძლება იქნეს წოდებული, როგორც ინფექციის გავრცელების მესამე ტალღა", — თქვა ტიკარაძემ.

საქართველოს მასშტაბით საკოორდინაციო საბჭოს გადაწყვეტილებით, 25 თებერვლიდან შეზღუდვები შემსუბუქება დაიწყო. 1-ლი მარტიდან მუშაობა აღადგინეს კერძო და საჯარო ბაღებმა; განახლდა კონფერენციები და ტრენინგები; 8 მარტიდან გაიხსნა სამთო კურორტებზე საბაგიროები, ხოლო სავაჭრო მოლებმა და ბაზრობებმა მუშაობა შაბათ-კვირასაც განაახლეს.